Կենտրոնական Եվրոպայի երկրները Եվրահանձնաժողովին եւ նրա նախագահ Ժան Կլոդ Յունկերին մեղադրում են Մեծ Բրիտանիային ԵՄ կազմից դուրս գալու օգտին քվեարկելու դրդելու մեջ, գրում է Financial Times–ը։
Վիշեգրադի երկրների՝ Լեհաստանի, Հունգարիայի, Սլովակիայի եւ Չեխիայի առաջնորդները Յունկերին պաշտոնանկ անելու եւ ԵՄ գլխավոր գործադիր մարմինը բարեփոխելու կոչ են արել։
«Մեզ հետաքրքրում է հարցը, թե Եվրահանձնաժողովի ղեկավարությունն իրավունք ունի արդյոք շարունակել աշխատանքը։ Մեր կարծիքով, չունի»,– ասել է Լեհաստանի արտգործնախարար Վիտոլդ Վաշիկովսկին։
FT–ը կարծում է, որ այդ հայտարարությունները չեն հանգեցնի Յունկերի պաշտոնանկությանը, քանի որ Եվրախորհրդի նախագահ Դոնալդ Տուսկը նրան պաշտպանում է ինչպես վերջին մարդուն, ում վրա կարելի է բարդել Brexit–ի պատասխանատվությունը։
Թերթը նշում է, որ այդ մեղադրանքների հետեւում Կենտրոնական Եվրոպայի վախն է, որ Brexit–ը կնպաստի ԵՄ–ում ինտեգրացիայի ուժեղացմանը, իսկ այդ երկրները դեմ են նման սցենարի՝ ի տարբերություն Ֆրանսիայի եւ Գերմանիայի։