Վարչապետ Հովիկ Աբրահամյանի գլխավորությամբ կառավարությունում տեղի է ունեցել խորհրդակցություն, որի ընթացքում քննարկվել են Հայաստանի եւ Եվրոպական Միության հարաբերությունների, ինչպես նաեւ նոր շրջանակային համաձայնագրի շուրջ բանակցությունների ընթացքին առնչվող հարցեր:
Կառավարությունից NEWS.am-ին հայտնում են, որ խորհրդակցությանը մասնակցել ու համապատասխան զեկույցներով հանդես են եկել փոխվարչապետ, Միջազգային տնտեսական ինտեգրման եւ բարեփոխումների նախարար Վաչե Գաբրիելյանը, Էկոնոմիկայի նախարար Արծվիկ Մինասյանը, Արտաքին գործերի նախարարի տեղակալ Կարեն Նազարյանը եւ Էկոնոմիկայի նախարարի առաջին տեղակալ Գարեգին Մելքոնյանը: Խորհրդակցության ընթացքում քննարկվել են ԵՄ-ի հետ օրակարգային հարցերը ու ոլորտային տարբեր ուղղություններով արձանագրված առաջընթացը:
Վարչապետ Հովիկ Աբրահամյանը համապատասխան հանձնարարականներ է տվել ու կարեւորել է բանակցային գործընթացի արդյունավետ անցկացումը, ինչն ամուր հիմքեր կստեղծի տարբեր ուղղություններով ՀՀ-ԵՄ համագործակցության հետագա զարգացման ու ընդլայնման համար:
