ԱՄՆ կառավարության Օտարերկրյա մասնավոր ներդրումներ կորպորացիայի (OPIC - The Overseas Private Investment Corporation) երաշխավորությամբ Արդշինբանկը ամերիկյան World Business Capital» (WBC) ընկերության հետ 2016թ. Հունիսի 30-ին ստորագրել է 10.0 միլիոն ԱՄՆ դոլարի վարկային պայմանագիր:
Արդշինբանկից NEWS.am-ին հայտնում են, որ պայմանագրի շրջանակներում ստացված գումարները կուղղվեն Բանկի հաճախորդ փոքր եւ միջին ձեռնարկությունների (ՓՄՁ) վարկավորմանը:
Ծրագրի շրջանակներում Արդշինբանկը տրամադրելու է վարկեր իր հաճախորդներին սկսած տարեկան 11% տոկոսադրույքից մինչեւ 10 տարի մարման ժամկետով:
Ամերիկյան World Business Capital» (WBC) ընկերությունը մասնավոր ֆինանսավորող կառույց է, որը տրամադրում է վարկեր ՓՄՁ ոլորտի աջակցության նպատակով:
Օտարերկրյա մասնավոր ներդրումներ կորպորացիան (OPIC - The Overseas Private Investment Corporation) ԱՄՆ կառավարության զարգացման ֆինանսական կառույցն է, որը կոչված է խթանելու ԱՄՆ մասնավոր ներդրումները աշխարհի 160 երկրներում:
Արդշինբանկը ակտիվներով Հայաստանի երկրորդ բանկն է եւ ունի վաճառքի լայն ցանց կազմված 55 մասնաճյուղից:
Բանկը Հայաստանի միակ մասնավոր կառույցն է, որը միջազգային ֆինանսական շուկաներում թողարկել է եվրոպարտատոմսեր ու ունի միջազգային հեղիանակավոր վարկանշային երկու գործակալություններից (Moody’s եւ Fitch) ստացված վարկանիշ՝ հավասար Հայաստանի Հանրապետության վարկանշային մակարդակին: