Եվրամիության հետ Վրաստանի եւ Մոլդովայի Ասոցացման մասին համաձայնագրերն ուժի մեջ են մտել: Այս մասին ասված է Եվրահանձնաժողովի հաղորդագրությունում:
Համաձայնագրերը ենթադրում են Եվրամիության երկրների հետ ազատ առեւտրի գոտու ստեղծում:
«Այսօր պատմական օր է, հնարավոր է՝ անկախության հռչակումից ի վեր կարեւորագույն օրերից մեկը: Այսօրվանից Մոլդովան Եվրամիության հետ ասոցացված պետություն է»,- հայտարարել է Մոլդովայի խորհրդարանի խոսնակ Անդրիան Կանդուն:
Ըստ ՌԻԱ Նովոստիի, Վրաստանի վարչապետ Գեորգի Կվիրիկաշվիլին նշել է փաստաթղթի՝ ուժի մտնելու կարեւորությունը, ընդգծելով, որ այդպիսով Եվրամիության հետ փոխգործակցությա նոր փուլ է սկսվում: Նա նաեւ հույս է հայտնել, որ մոտ ապագայում հաջողությամբ կավարտվի նաեւ ԵՄ-ի վիզային ռեժիմի ազատականացման գործընթացը եւ Վրաստանի քաղաքացիները կկարողանան առանց վիզայի այցելել Եվրոպայի երկրներ:
