«Կրկին նշում եմ, չկա այնպիսի հարց, որը հնարավոր չլինի լուծել Վրաստանի հետ երկխոսության միջոցով»,- հայտարարել է Հայաստանի արտգործնախարար Էդվարդ Նալբանդյանը՝ կրկնելով իր խոսքերը, որ արել էր Վրաստանի ԱԳՆ ղեկավար Գրիգոլ Վաշաձեի հետ Երեւանում համատեղ ասուլիսի ընթացքում:
Պատասխանելով Հանրապետական խմբակցության պատգամավոր Շիրակ Թորոսյանի հարցին, թե ի՞նչ հարցեր են քննարկվել Վաշաձեի հետ հանդիպմանը, Նալբանդյանը նշել է. «Քննարկվել են ե՛ւ եկեղեցուն, ե՛ւ դպրոցներին վերաբերող հարցեր։ Բանակցությունների ժամանակ Վրաստանի արտգործնախարարը խոսք տվեց, որ ժամերի ընթացքում կլուծվի, օրինակի համար, Լարսի անցակետի բացման հարցը, եւ դա արվեց»:
Խոսելով Վաշաձեի այն հայտարարության մասին,թ ե ինքը չգիտի, թե ինչ է Ջավախքը, Նալբանդյանը նկատել է, որ այն կարծիքին չէ, որ Հայաստանի արտգործնախարարը պետք է խառնվեր այդ հարցուպատասխանին, քանի որ դա արտգործնախարարին հարիր ոճ չէ։
Պատասխանը չի բավարարել Շիրակ Թորոսյանին, ով ընդգծել է, թե Վրաստանը միտումնավոր խնդիրներ է հարուցում իր պաշտոնյաների այցից առաջ, որպեսզի հետո Երեւանում ուշադրությունը շեղի հիմնական հարցերից:
Ի պատասխան Նալբանդյանը նկատել է. «Էմոցիոնալ որոշումներով կամ գնահատական տալով՝ այս կամ այն հարցը չես լուծի»:
