Կնեսետի խոսնակ Յոել Էդելշթեյնը կոչ է արել չանտեսել, չնվազեցնել կամ ժխտել Հայոց ցեղասպանությունը: «Մենք պետք է տարբերություն դնենք մեր ընթացիկ շահերի եւ դժվարին անցյալի միջեւ, որի մաս է կազմում պատմության այս մութ գլուխը»,- հուլիսի 5-ին կայացած քննարկումների ժամանակ հայտարարել է Կնեսեթի խոսնակը:
Նա նշել է, որ հարկավոր է ճանաչել Հայոց ցեղասպանությունը, քանի որ Իսրայելի ժողովուրդն ազգերի եւ ժողովուրդների ընտանիքի մաս է կազմում, որի արժեքներն ու յուրաքանչյուր մարդու հանդեպ կարեկցանքն առաջնային նշանակություն ունեն:
«Եկեք անտարբեր չմնանք հայերի կրած տառապանքների հանդեպ, չնայած հիմա արդեն փոքր-ինչ ուշ է»,- ընդգծել է Էդելշթեյնը՝ խոստանալով, որ Կնեսեթը կշարունակի իր ներկայացուցիչներին ուղարկել Երեւան՝ հիշատակի միջոցառումների մասնակցելու:
«Մերեց» կուսակցությունից քննարկումը նախաձեռնած պատգամավոր Զահավա Գալոնն իր հերթին հայտարարել է, որ Թուրքիայի հետ հարաբերություններում փոփոխությունները դժվարացնում են իրերն իրենց անուններով կոչելու՝ կառավարության գործը:
Գալոնն ընդգծել է, որ Իսրայելի ԱԳՆ-ն ճնշում է գործադրել իրենց նկատմամբ՝ հարց ուղղելով. «Ինչո՞ւ եք այդ հարցը բարձրացնում դիվանագիտության համար այսպիսի զգայուն պահի»: «Չնայած դրան, ես հայտարարում եմ, որ Կնեսեթը պետք է ճանաչի Հայոց ցեղասպանությունը»:
Նրա խոսքով, այս տարիներին ցեղասպանության ճանաչումը խաղալիքի է վերածվել, որը կարող է ղողանջել, երբ Թուրքիայի հետ հարաբերությունները վատ են, իսկ հետո մոռանալ դրա մասին՝ Էրդողանին սիրաշահելու համար: «Մենք կանգնել ենք քաղաքականության վտանգավոր ուղու վրա, որտեղ ամեն ինչ վաճառվում է»,- հավելել է նա:
