Ընթացիկ տարվա հունվար-մայիսին հետաքրքիր ֆենոմեն է գրանցվել. «պատրաստի սննդամթերք» ապրանքային խմբում արտահանումը գերազանցել է ներկրումը: Մեկ պարզաբանում. պաշտոնական տեղեկատվության մեջ այս խմբում ներառված ապրանքների անվանումները ներկայացվում են ոչ ամբողջությամբ: Իրականում խումբը, բացի սննդամթերքից, ներառում է նաեւ ալկոհոլային խմիչք եւ ծխախոտ:
Նկատենք, որ «պատրաստի սննդամթերքի» ներկրման ծավալները հունվար-մայիսին երկնիշ աճ են արձանագրել. տարեկան կտրվածքով՝ 25.8%: Սակայն այս խմբի ապրանքների արտանահումը ռեկորդային աճ է ցուցադրել՝ 38.3%: Նշենք, որ Հայաստանի արտահանման ընդհանուր ծավալներում այս ապրանքների մասնաբաժինը հունվար-մայիսին հասել է 21.8%-ի: Իսկ ահա ներկրման մեջ այդ ցուցանիշը շատ ավելի պակաս է՝ 10.7%:
Հայտնի է, որ անցյալ տարի Հայաստանի արտահանման մեջ անբարենպաստ միտումներ են նկատվել, որոնք որոշակիորեն կապված էին նաեւ առաջատար ապրանքներից մեկի՝ կոնյակի հետ: Անցյալ տարվա հունվար-մայիսին «պատրաստի սննդամթերքի» արտահանման ծավալները տարեկան կտրվածքով կրճատվել են 12%-ով: Սակայն ընթացիկ տարվա հունվար-մայիսին կտրուկ աճը թույլ է տվել բարելավել երկամյա վաղեմության ձեռքբերումը. 142.9 մլն դոլարի՝ 2014 թվականի նույն ժամանակահատվածի 117.9 մլն դոլարի դիմաց:
Մեկ այլ տեղեկատվության համաձայն, պատրաստի սննդամթերքի (առանց ալկոհոլային խմիչքների եւ ծխախոտի) ներկրումը հունվար-մայիսին կազմել է շուրջ 5.7 մլրդ դրամ: Համեմատության համար նշենք, որ խմիչքի մասով այդ ցուցանիշը կազմել է 24.4 մլրդ դրամ, ծխախոտի մասով՝ 34.4 մլրդ դրամ: Այնպես որ՝ խմիչքների եւ ծխախոտի արտահանման ընդհանուր ծավալներն ավելի քան 10 անգամ գերազանցել են սննդամթերքի ցուցանիշը:
Հիշեցնենք, որ արտահանվող խմիչքների գերակշռող մասը (հունվար-մայիսին՝ գրեթե 84%) բաժին է հասել ԱՊՀ երկրներին, մասնավորապես Ռուսաստանին: Ծխախոտի պարագայում պատկերը հակառակն է. նշված ժամանակահատվածում ԱՊՀ երկրների մասնաբաժինը խորհրդանշական է եղել՝ ընդամենը 3%:
Սմբատ Գրիգորյան