Այս տարվա ընթացքում Ռուսաստանի եւ Հայաստանի միջեւ առեւտրաշրջանառությունն աճել է 10 տոկոսով՝ հասնելով 450 մլն դոլարի: Այս մասին, այսօր՝ հուլիսի 8-ին, Հայաստանի եւ Ռուսաստանի միջեւ տնտեսական համագործակցության միջկառավարական հանձնաժողովի նիստից հետո իր խոսքում նշել է ռուսական կողմի համանախագահ, ՌԴ տրանսպորտի նախարար Մաքսիմ Սոկոլովը:
Նա իր խոսքում, մասնավորապես, նշել է.
«Մեր աշխատանքն իրականացվում է բացառապես բաց, ինչպես հարիր է իսկական բարեկամներին, գործընկերներին: Այն բոլոր շփումները, աշխատանքները, որոնք իրականացվում են մեր միջկառավարական հանձնաժողովի շրջանակում՝ խոսում է այն մասին, որ սա իսկապես օպերատիվ համաձայնեցման, բոլոր հարցերի լուծման եւ համատեղ գործողությունների արդյունավետ մեխանիզմ է:
Ոչ միայն հանձնաժողովի նիստերը, այլ նաեւ համանախագահների, աշխատանքային խմբերի ղեկավարների, հանձնաժողովի անդամների հանդիպումներն անցկացվում են պարբերաբար եւ դա օրինակելի է, քանի որ կապերը շատ սերտ են եւ իսկապես աշխատանքային: Դա թույլ է տալիս օպերատիվ կերպով լուծել բոլոր հարցերը, եւ արդյունքները խոսում են իրենք իրենց մասին: Այս տարվա ընթացքում Ռուսաստանի եւ Հայաստանի միջեւ առեւտրաշրջանառությունն աճել է 10 տոկոսով՝ հասնելով 450 մլն դոլարի, հայկական ապրանքների արտահանումը Ռուսաստան ավելացել է մի քանի անգամ, անցնելով 125 մլն դոլարի շեմը, եւ ակնհայտ է, որ չնայած արտաքին տնտեսական եւ քաղաքական լարված իրավիճակին՝ Ռուսաստանը եղել եւ մնում է Հայաստանի հիմնական առեւտրային գործընկերը: Մեր այսօրվա նիստի օրակարգն ընդգրկել է հարցերի լայն շրջանակ, ինչպես միշտ հիմնական ուշադրությունը դարձվել է էներգետիկայի, տրանսպորտի, գյուղատնտեսական արտադրանքի մատակարարման, հումանիտար ոլորտում փոխգործակցության ընդլայնմանը»: