Գարեգին Բ Ամենայն Հայոց Կաթողիկոսը Մայր Աթոռ Սուրբ Էջմիածնում հուլիսի 10-ին ընդունել է ԱՄՆ Հայոց Արեւելյան թեմի ավելի քան 30 ուխտավորների` ուղեկցությամբ Բոստոնի Ս. Երրորդություն եկեղեցու հոգեւոր հովիվ Արժանապատիվ Տ. Վազգեն քահանա Կուզույանի եւ Մինեսոտայի Ս. Սահակ եկեղեցու հոգեւոր հովիվ Արժանապատիվ Տ. Թադեոս քահանա Բարսեղյանի:
Հանդիպմանն Ամենայն Հայոց Հայրապետը, ողջունելով ուխտավորներին, գոհունակությամբ նշեց, որ հաճելի է տեսնել նրանց ներկայությունը Հայրենիքում եւ հատկապես համայն հայության հոգեւոր կենտրոն Մայր Աթոռ Ս. Էջմիածնում: Հայոց Հայրապետը կարեւորեց աշխարհասփյուռ հայոց թեմերից նման ուխտագնացությունների կազմակերպումը, որոնց շնորհիվ հայորդիները հնարավորություն են ունենում իրենց ուխտը վերանորոգելու եւ ոգեշնչվելու, ինչպես նաեւ առավել զորանալու իրենց ազգային ինքնությամբ:
Իր հայրապետական օրհնությունը բերելով ուխտավորներին` Նորին Սրբությունը բարձր գնահատեց նրանց հավատարմությունը հանդեպ հայոց նվիրական սրբությունները եւ ազգային հարուստ ժառանգությունը: Վեհափառը վերհիշեց նաեւ ԱՄՆ Հայոց Արեւելյան թեմ իր կողմից կատարված հովվապետական այցելությունները, որոնց ընթացքում մշտապես նկատելի է եղել սերը Հայ Եկեղեցու նկատմամբ եւ բացառիկ նվիրումը ազգային-եկեղեցական կյանքին:
Վերջում Նորին Սրբությունն առ Աստված աղոթքով մաղթեց, որ Տերն իր մշտական օրհնության ներքո պահի ու պահպանի ամենքին սիրո եւ նախանձախնդրության բարձր գիտակցության մեջ:
Զրույցի ընթացքում Հայոց Հովվապետը պատասխանեց նաեւ ուխտավորների հարցերին:
