Հայաստանի նախագահ Սերժ Սարգսյանն այսօր` հոկտեմբերի 7-ին ընդունել է ապակենտրոնացված համագործակցության հայ-ֆրանսիական համաժողովի մասնակիցներին:
Նախագահի մամուլի գրսենյակից NEWS.am-ին հայտնում են, որ պատվիրակության կազմում են Ֆրանսիայի քաղաքների, դեպարտամենտների եւ շրջանների տեղական ինքնակառավարման մարմինների ղեկավարներ, ինչպես նաեւ Ֆրանսիայի խորհրդարանի պատգամավորներ:
Սերժ Սարգսյանը նշել է, որ պատվիրակության անդամներից շատերն ամուր կապեր ունեն Հայաստանի հետ եւ տարբեր պատվիրակությունների կազմում քանիցս այցելել են մեր երկիր: «Հայ-ֆրանսիական բարեկամությունը շատ խորը արմատներ ունի: Ես մշտապես ասել եմ եւ հիմա էլ հաճույքով կրկնում եմ, որ Հայաստանն ու հայ ժողովուրդը դարեր ի վեր կապված են եղել Ֆրանսիայի եւ ֆրանսիական մշակույթի հետ: Այդ փոխկապակցվածությունն այնքան սերտ է, որ շատ դեպքերում նույնիսկ դժվար է տարանջատել: Շառլ Ազնավուրն ու Միշել Լեգրանը, Գառզուն ու Ժանսեմը, Անրի Վերնոյը, Անրի Թրուայան, Ալեն Թերզյանը, իհարկե, ֆրանսիական մշակույթի հենասյուներից են, բայց, բնականաբար, նաեւ` հայկական մշակույթի անբաժանելի մասը: Ես շատ ուրախ եմ, որ հայ-ֆրանսիական միջպետական հարաբերություններն օրըստօրե ավելի են ընդլայնվում եւ զարգանում»,-ասել է Սարգսյանը: Նա տեղեկացրել է, որ այսօր Հայաստանում գործում են 120-ից ավելի ֆրանսիական կապիտալով ընկերություններ, որոնց վերջերս միացավ նաեւ «Ֆրանս Տելեկոմ-Օրանժ»-ը:
«Այսօր երեսունից ավելի գործընկերային կապեր կան հաստատված, որոնց արդյունքում քույր քաղաքներն ու շրջանները իրականացնում են տասնյակ ծրագրեր: Լավ է, որ ապակենտրոնացված համագործակցության համաժողովը տեղի է ունենում Երեւանում եւ ունի հարուստ օրակարգ: Վստահ եմ, որ համաժողովը նոր թափ է հաղորդելու մեր համագործակցությանը»-ընդգծել է ՀՀ նախագահը:
«Այս տարի ամռանը Հայաստան այցելեցին ինչպես Սենատի, այնպես էլ Ազգային ժողովի «Ֆրանսիա-Հայաստան» բարեկամության խորհրդարանական խմբի անդամները, իսկ ԱԺ պատվիրակությունն իր կազմում ընդգրկել էր նաեւ «Ֆրանսիա-Թուրքիա» բարեկամության խմբի անդամներին: Նրանք միասին այցելեցին Լեռնային Ղարաբաղ, որտեղ հանդիպեցին տեղի մարդկանց ու Ղարաբաղի ղեկավարության հետ, տեսան, թե ինչպե՞ս են այդ մարդիկ ապրում եւ, ընդհանրապես, ի՞նչ է իրենից ներկայացնում Լեռնային Ղարաբաղի Հանրապետությունը: Վստահ եմ, որ նրանք կարողացան օբյեկտիվ գնահատել իրավիճակը»,- ասել է Սերժ Սարգսյանը: Նա նշել է, թե տեղյակ է, որ ապակենտրոնացված համագործակցություն կա նաեւ ԼՂ-ի հետ: Անդրադառնալով այս հարցում Ադրբեջանի հակազդեցությանը` ՀՀ նախագահն ասել է, որ պարզ է նաեւ Ադրբեջանի գործողությունների պատճառը. նրանք ցանկանում են, որպեսզի Ղարաբաղի մասին որեւէ մեկը, ընդհանրապես, որեւէ բան չիմանա, չլսի, չտեսնի: Հակառակ պարագայում` փլուզվում է իրենց կողմից ստեղծված մի ողջ կեղծ պատմություն: Նրա խոսքով, բոլոր նրանք, ովքեր այցելում են Լեռնային Ղարաբաղ, տեսնում են ղարաբաղցիների հաջողությունները, տեսնում են, թե ինչպիսի ազատատենչ ժողովուրդ է այնտեղ ապրում, ինչպիսի քրիստոնեական մշակույթ են կարողացել ձեւավորել հազարամյակների ընթացքում եւ տեսնում են մարդկանց վստահությունը վաղվա օրվա հանդեպ: Սերժ Սարգսյանը հանդիպման մասնակիցներին եւս կոչ է արել այցելել Լեռնային Ղարաբաղ: