Փարիզի արվարձաններից մեկում կիրակի լույս երկուշաբթի գիշերը ձերբակալված վարորդի մոտ ոստիկանությունը պայթուցիկ եւ պայթուցիչ է հայտնաբերել, իսկ հեռախոսում՝ «Իսլամական պետություն» խմբավորման դրոշի լուսանկար: RFI-ի փոխանցմամբ, այս մասին հաղորդել է կառավարության պաշտոնական ներկայացուցիչ Ստեֆան լե Ֆոլը:
23-ամյա տղամարդը, որի անունը չի հրապարակվում, ռադիկալ հայացքների պատճառով արդեն եղել է ֆրանսիական հատուկ ծառայությունների ցուցակում, սակայն ոստիկանության կողմից ձերբակալվել է այն հաճախորդների բնակարաններում գողություն կատարելու կասկածանքով, որոնց օդանավակայան է տարել: Տղամարդը ձերբակալված է:
Նրա տան խուզարկության ընթացքում պայթուցիկներ եւ պայթուցիչ են հայտնաբերել, սակայն կառավարության ներկայացուցիչը չի կարողացել մեկնաբանել, արդյո՞ք դա նախապատրաստվող ահաբեկչության ապացույց է:
Նախօրեին Ֆրանսիայի վարչապետ Մանուել Վալսը հայտարարել էր, որ իշխանությունները կարողացել են ֆուտբոլի Եվրոպայի առաջնությունից առաջ նաապատրաստվող ահաբեկչություն կանխել: ՆԳ նախարար Բեռնար Կազնյովի խոսքով էլ՝ վերջին մեկուկես տարվա ընթացքում երկրում, ընդհանուր առմամբ, 15 ահաբեկչություն է կանխվել:
