ՊՊԾ գնդի գրոհից 74 ժամ անց. Իրավիճակը Երեւանում (ֆոտո)

74 ժամից ավելի է անցել Երեւանի Խորենացի փողոցում տեղի ունեցած միջադեպից, որտեղ զինված խմբի անդամները ոստիկանության ՊՊԾ գնդում պատանդ են պահում մի քանի ոստիկանների (ֆոտոռեպորտաժ):

Այս պահին իրավիճակը հանգիստ է, գիշերը եւս հանգիստ է անցել: Առավոտյան Խորենացի փողոցում են ՀՀ փոխոստիկանապետեր Լեւոն Յերանոսյանն ու Սամվել Հովհաննիսյանը:

Սակայն նախօրեին բախում է տեղի ունեցել ոստիկանների ու քաղաքացիների միջեւ: Ոստիկանների փոխանցմամբ, Սարի թաղի կողմից քաղաքացիներ են եկել, փորձել են մուտք գործել պահպանվող տարածք։ Նրանք նաեւ քարեր եւ տարբեր առարկաներ են նետել ոստիկանների ուղղությամբ, երեք ոստիկան վիրավորվել: Դեպքի վայր են մեկնել ՀՀ ոստիկանապետի տեղակալներ Սամվել Հովհաննիսյանը եւ Լեւոն Երանոսյանը, ինչպես նաեւ Երեւանի ոստիկանապետ Աշոտ Կարապետյանը: Նրանք հայտնել են, որ բախման հետեւանքով քաղաքացիներ չեն տուժել։

ԱԱԾ-ի փոխանցմամբ ինտենսիվ բանակցությունները ՊՊԾ գնդում գտնվողների հետ շարունակվում են:

Հանգիստ չի եղել նաեւ Խորենացի փողոցում. ոստիկաները մի քանի շարքով եւ բեռնատարներով փակել են ճանապարհը, իսկ ցուցարարները պնդել են, թե ներսում՝ ՊՊԾ գնդում ինչ-որ բան է կատարվում, քանի որ կրակոցների ձայն են լսել: Ակտիվիստներից մեկը բարձրախոսով հայտնել է, թե խոսել է Վարուժան Ավետիսյանի հետ։ Վերջինս հայտնել է, թե իրենք են օդ կրակել՝ ի պաշտպանություն ցուցարարների։ Նա նաեւ հայտնել է, թե իրենց վրա որեւէ հարձակում չի եղել։

Նախօրեին նաեւ տեղեկություն էր տարածվել, որ ռուսական «Ալֆա» ջոկատ բերելու մասին, սակայն Երեւանի ոստիկանապետ Աշոտ Կարապետյանը կտրականապես հերքել է նման տեղեկությունները՝ նշելով, որ նման բան չի կարող լինել:

Հիշեցնենք, որ հուլիսի 17-ի առավոտյան մի խումբ զինված անձինք Էրեբունիում գրոհով վերցրել են ՊՊԾ գունդը եւ պատանդ են վերցրել ոստիկանության սահմանափակ թվով ծառայողների: Մեկ ոստիկան՝ նույն գնդի փոխհրամանատար Արթուր Վանոյանը զոհվել է: Վիրավորվել են եւս չորս ոստիկաններ՝ ոստիկանության գնդապետ Արամ Հովհաննիսյանը, փոխգնդապետ Հրաչ Խոստեղյանը, ոստիկանության ենթասպա Գագիկ Մկրտչյանը, օպերատոր Ռոբերտ Հայրապետյանը, նաեւ ՊՊԾ գնդի գրոհին մասնակցած անձանցից մեկը՝ Թաթուլ Թամրազյանը: Վերջինիս վիճակը գնահատվում է ծանր, նա վերակենդանացման բաժանմունքում է:

Լուրեր Հայաստանից - NEWS.am

Այս նյութը հասանելի է նաև English and Русский

Տպել