Լեռնային Ղարաբաղի Հանրապետության իշխանությունների եւ ժողովրդի գերակա նպատակն է ուժեղ, ժողովրդավարական, սոցիալական եւ իրավական պետություն կառուցելը եւ մեր քաղաքացիների անվտանգության ապահովումը: Այս մասին «Լենտա»-ի հետ հարցազրույցում հայտարարել է ԼՂՀ նախագահ Բակո Սահակյանը:
Պատասխանելով հարցին, թե ինչպես է հնարավոր ապրել անորոշության եւ մարտական գործողությունների վերսկսման մշտական սպառնալիքի պայմաններում, ԼՂՀ ղեկավարն ասել է. «Բնական է, այն, որ ԼՂՀ-ն ճանաչված չէ, բավական ուժեղ է ազդում հանրապետության եւ նրա քաղաքացիների կյանքի վրա: Օրինակ՝ չճանաչված պետությունները զրկված են տարբեր երկրների եւ միջազգային կառույցների հետ լիարժեք համագործակցություն զարգացնելու հնարավորությունից՝ դրանից բխող բոլոր հետեւանքներով»:
Նրա խոսքով՝ Ղարաբաղի ժողովուրդը այս ընթացքում ամենամեծ դժվարությունների հանդեպ բարձր դիմադրողականություն է ձեռք բերել. «Պատմականորեն այնպես է ձեւավորվել, որ մենք ստիպված ենք եղել մշտապես պայքարել մեր ազատության, անկախության, պատվի եւ արժանապատվության համար, ապրել եւ զարգանալ աշխարհաքաղաքական խիստ շրջապատում: Իսկ դա նշանակում է, որ չճանաչվածությունը մենք ընկալում ենք սոսկ որպես ժամանակավոր դժվարություն, որը պարտադիր պետք է հաղթահարենք»: