Երեւանի Խորենացի փողոցում հուլիսի 20-ին ոստիկանների եւ ցուցարարների միջեւ տեղի ունեցած բախումից հետո «Սուրբ Գրիգոր Լուսավորիչ» բժշկական կենտրոն է դիմել 11 ոստիկան եւ 2 ցուցարար: Այս մասին քիչ առաջ լրագրողների հետ զրույցում ասաց ԲԿ-ի վերակենդանացման բաժանմունքի վարիչ Սամվել Կարապետյանը:
Հիվանդանոց տեղափոխված տուժածները ստացել են քերծվածքներ, սալջարդներ: Կան նաեւ գազից թունավորվածներ: Նրանցից երկուսը, ըստ բաժնի վարիչի, համեմատաբար լուրջ վնասվածքներ են ստացել:
Ցուցարարներից Սվետա Սրապյանը լրագրողների հետ զրույցում ասաց, որ ոտքի վնասվածք է ստացել:
«Լուսավորություն զգացի ու ոտքերիս տակ պայթյուն, արագ վազեցի, իմ հետեւից էլի պայթեց, բոլորը վազում էին»,- պատմեց Սվետա Սրապյանը:
Մարմնական վնասվածքներ է ստացել նաեւ Հայաստանի աշխատավորական սոցիալիստական կուսակցության նախագահ Մովսես Շահվերդյանը ։
«Էրեբունի» բժշկական կենտրոն է տեղափոխվել 18 տուժած, որոնցից 15-ը ոստիկաններ են: Տուժածներից 2-ը գտնվում են Վերակենդանացման բաժանմունքում: Նրանցից մեկը համեմատաբար լուրջ վնասվածքներ է ստացել գլխի շրջանում:
Նշենք, որ ըստ առողջապահության նախարարության` միջադեպից հետո մայրաքաղաքի հիվանդանոցներ են տեղափոխվել 45 տուժած, որից 25-ը` ոստիկաններ են:
Հիշեցնենք, որ հուլիսի 20-ին բախում է տեղի ունեցել ոստիկանների եւ ցուցարարների միջեւ: