ՀՀ էկոնոմիկայի նախարար Արծվիկ Մինասյանը ոստիկանության ՊՊԾ գունդը գրաված զինված խմբի անդամներին կոչ է անում օր առաջ հանձնվելու որոշում կայացնել, ինչը թույլ կտա հետագա գործընթացներն օրենքի ու սահմանադրության շրջանակում իրականացնել: Այս մասին նա նշել է այսօր՝ հուլիսի 21-ին կառավարության նիստից հետո լրագրողների հետ զրույցի ժամանակ:
«Իրավիճակի լիցքաթափումը պահանջում է, որ հանդուրժողականությունը տիրի, ողջախոհությունը հաղթի եւ զինված հարձակումը կազմակերպած անձինք ընկալեն, որ ՀՀ-ում պետք է գործի օրենքը, սահմանադրական նորմը եւ օր առաջ որոշում կայացնեն հանձնվելու մասին, ինչը թույլ կտա հետագա գործընթացներն իրականացնել օրենքի շրջանակներում»,-ասել է նա:
Հարցին, թե իր համար այդ մարդիկ ապստամբնե՞ր են, թե՞ ահաբեկիչներ, Արծվիկ Մինասյանը պատասխանեց. «Ես կարող եմ այդ հարցին պատասխանել այն գործողություններով, որոնք արձանագրվում են. քրեական օրենսգրքի հոդվածներում կա նկարագրված առնվազն «պատանդ վերցնել» արտահայտությունը: Ինչ վերաբերում է այլ ընկալումներում, ապա ես վստահ եմ, որ դա առաջիկայում քննարկվելու է»:
Ինչ վերաբերում է ոստիկանության գործողություններին՝ Մինասյանն ասել է. «Այնքանով, որքանով հետեւել եմ ոստիկանության գործողություններին, ես նույնիսկ բարձր եմ գնահատում հանդուրժողականության այն մակարդակը, որ ցուցաբերվեց: Եթե մանրամասն քննություն իրականացվի իրավասու մարմինների կողմից, համոզված եմ, որ կարող է առանձին դրվագներ, դեպքեր լինեն, երբ կա ոչ իրավաչափ վարքագիծ կամ ոչ համաչափ դրսեւորում»:
