Հայաստանում ներկա պահին ապահովագրված է 20 հազ. ավտոմեքենա, որոնց հետ կապված մինչ այսօր տեղի է ունեցել 1207 տրանսպորտային պատահար։ Այդ մասին այսօր մամուլի ասուլիսում հայտարարեց ավտոապահովագրական բյուրոյի գործադիր տնօրեն Վահան Ավետիսյանը։ Հատուցման ենթակա միջին վնասը կազմել է 600 հազ. դրամ (մոտ 1650 դոլար)։

Պարտադիր ավտոապահովագրության ներդրումից հետո, ըստ Կենտրոնական բանկի նախագահի տեղակալ Վաչե Գաբրիելյանի, ապահովագրական ընկերություններում կկուտակվի 10-12 մլրդ դրամ (27 – 33 մլն դոլար)։ Անձնական վնասի դեպքում (մահ կամ առողջության կորուստ) հատուցումը կկազմի մինչեւ 3 մլն դրամ (մոտ 8,2 հազ. դոլար), իսկ գույքային վնասի դեպքում՝ մինչեւ 1,5 մլն դրամ (մոտ 4,1 հազ. դոլար)։ Ըստ Վ. Գաբրիելյանի՝ 3 մլն դրամը բավական է, որ Հայաստանի հիվանդանոցներում մարդիկ կարողանան որակյալ բուժում ստանալ։