Նիդեռլանդներում ապրող աֆղանստանցի Մասուն Հասանին գեքսակոպտեր է ստեղծել, որը կարելի է օգտագործել ականների որոնման եւ վնասազերծման համար։ Սարքի աշխատանքը 200 անգամ ավելի էժան է, քան մասնագետներ վարձելը, բացի այդ, այն 20 անգամ ավելի արագ է աշխատում։ Այս մասին ասվում է Kickstarter–ում նախագծի նկարագրության մեջ։

Դրոնն ունի բարձր թույլտվությամբ տեսախցիկ, ռոբոտացված ձեռք եւ մետաղի դետեկտոր։ Mine Kafon Drone կոչվող սարքը կունենա 3 փոփոխվող մոդուլ։ Առաջինը 3D քարտեզագրության համակարգ է եւ GPS։ Դրոնը կշրջի տեղանքով, կկազմի եռաչափ քարտեզ եւ ավտոմատ կկազմի GPS նշումները կրկնակի թռիչքի համար։ Դրանից հետո սարքը վերադառնում է օպերատորի մոտ, որը փոխում է մոդուլը եւ մետաղորսիչ տեղադրում։ Դրանով դրոնը փոքր բարձրության վրա տեղանքում թռիչքներ է իրականացնում եւ դրանից առաջ կազմած քարտեզի վրա նշում այն տեղերը, որտեղ ականներ են հայտնաբերվել։ Հետո տեղադրվում է մանիպուլյատորը, որը ականապատ տեղերում հատուկ դետոնատորներ է դնում եւ հեռանալով՝ պայթեցնում։

Հասանին պլանավորում է 10 տարում ականազերծել ամբողջ մոլորակը։