Iravaban.net կայքի լրագրող Գեւորգ Թոսունյանը ոստիկանությունում հաղորդում է տվել հուլիսի 21-ին Խորենացի փողոցում բռնության ենթարկվելու մասին: Այս մասին NEWS.am-ի հետ զրույցում ասաց լրագրողը:
Գեւորգ Թոսունյանը պատմեց, որ իրեն ծեծել են քաղաքացիական հագուստով անձինք, ինքը ենթադրում է, որ ոստիկաններ են եղել:
«Գիշերը ժամը 3-ի սահմանում էր, ակտիվիստները եկան դեպի Խորենացի ու ասացին, որ իրավիճակը Տիգրան Մեծի պողոտայում լարված է: Ես նկատեցի ոստիկաններին ու նրանցից հեռու մոտ 40 քաղաքացիական հագուստով անձանց, որոնք քարեր ու շշեր էին նետում: Մոտեցա, որ նկարեմ, տարբեր անձինք մոտեցան, ասացին, թե մեզ մի նկարի, ասացի`լավ, չեք ուզում, չեմ նկարի: Հետո յոթ հոգի շրջապատեցին ինձ, ասեցին`չիպը պիտի տաս, ես հրաժարվեցի ու իրենք գցեցին ինձ ու սկսեցին ոտքերով հարվածել մեջքից»,- դեպքի մանրամասները պատմեց Գեւորգ Թոսունյանը:
Այդ ընթացքում Գեւորգը շարունակել է նկարահանումները, ապա նրանցից մեկը վերցրել է տեսախցիկը, հանել հիշողության քարտն ու սարքը վերադարձրել նրան:
«Հետո ինձ թույլ տվեցին հեռանալ ու սպառնացին, որ այլեւս ցույցերի չմասնակցեմ»,- ասաց նա:
