2017–ի երկրորդ կիսամյակում ռուսական Polymetal-ը հոլդինգը ցանկանում է Կապանի ոսկու եւ պոլիմետաղների հանքում ավելացնել հանքանյութի արդյունահանումը ամսական մինչեւ 50 հազար տոննա: Այս մասին հայտարարվել է 2016–ի երկրորդ եռամսյակի աշխատանքների միջազգային արդյունքները ներկայացնելիս:
Դրան հասնելու համար Polymetal-ը (ի դեմս Հայաստանում իր դուստր ընկերության) առաջին հերթին պատրաստվում է բարձրացնել աշխատակիցների մոտիվացիան, երկրորդ՝ կատարելագործել ինժեներական աշխատանքները: Այդ թվում՝ ընկերությունը կկիրառի թունելների պահպանման նոր մոտեցումներ (հանքավայրը ստորգետնյա է): Մինչեւ արդյունահանումն ավելացնելը, պլանավորվում է կատարել նաեւ ստորգետնյա նախահետախուզում:
Polymetal-ի հայկական հանքավայրը (Կապան հանքավայրը նույն ինքը Շահումյան հանքավայրն է) ընկերության 8 հանքավայրերի թվում արդյունահանման ծավալով ամենափոքրն է: 2016-ի առաջին կիսամյակում այնտեղ մշակվել է միայն 64 հազար տոննա հանքանյութ, իսկ մետաղական խտանյութով, մաքուր մետաղի վերահաշվարկով, արտադրվել է 3,4 ունցիա ոսկի, 100 հազար՝ արծաթ, 139 տոննա պղինձ եւ 705 տոննա զինկ:
Ընկերությունը նաեւ Հայաստանում իր դուստր ձեռնարկության կառավարող տնօրեն է նշանակել՝ 43-ամյա Դմիտրի Ուշակովին, որի ենթակայության տակ կլինի նաեւ երկրաբանական հետախուզումը, այդ թվում՝ Հայաստանի այլ հանքավայրում՝ Լիճքվազի ոսկու հանքավայրում (այժմ չի շահագործվում): Նախկինում Ուշակովը մի շարք կառավարող պաշտոններ է զբաղեցրել Polymetal խմբի ձեռնարկություններում:
