ՊՊԾ գնդի գրավումից հետո գազամատակարարումից, երթուղային տրանսպորտից զրկված Սարի թաղի բնակիչների գազամատակարարումը նախօրեին վերականգնվել է, սակայն բնակիչները դեռ երթուղայինի խնդիր ունեն: Բնակիչները NEWS.am-ին պատմեցին, որ երեք օր երթուղային չեն ունեցել, մեկ օր է՝ այն գործում է, սակայն նոր երթուղով, որն այնքան երկար է, որ շարունակում են տաքսիներից օգտվել:
«Գնում է 70 դպրոցի մոտով, Դավիթ Բեկով, կայaրանով, մի ժամ տեւում է, մինչեւ քաղaք է հասնում, ստիպված էլի կամ ոտքով ենք իջնում, կամ տաքսիներով: Երեխան պարապունքի է գնում, ամեն օր 2000 դրամ գումար ենք տալիս տաքսուն, որովհետեւ էս շոգին հնարավոր չի երեխեքի համար էդքան երկար ճանապարհ գնալ»,- ասաց բնակիչներից մեկը:
Սարի թաղ տանող երթուղայիններից մեկի վարորդը NEWS.am-ի հետ զրույցում նշեց, որ ուղեւորների թիվը զգալիորեն պակասել է, փոփոխված երթուղիով քաղաք հասնելը 30 րոպե ավելի ժամանակ է խլում:
Բացի երթուղայինի խնդրից մինչեւ այժմ Սարի թաղում ինտերնետային կապի խնդիր կա: Դրա պատճառով արդեն 5 օր է՝ խաթարվել է թաղամասի պոլիկլինիկայի աշխատանքը:
«Օրական մոտ 100 հիվանդ ենք ընդունում, ամեն հարց էլեկտրոնային ենք կարգավորում, ինտերնետ չունենալը մեծ խնդիր է առաջացնում»,- NEWS.am-ի հետ զրույցում ասաց պոլիկլինիկայի աշխատակիցներից մեկը:
Աշխատակիցը նշեց նաեւ, որ երթուղայինի չաշխատելու պատճառով պոլիկլինիկայի աշխատողների կեսն արդեն 5 օր է՝ աշխատանքի գալ չի կարողանում:
Հիշեցնենք, որ հուլիսի 17-ի առավոտյան մի խումբ զինված անձինք Էրեբունիում գրոհով վերցրել են ՊՊԾ գունդը եւ պատանդ են վերցրել ոստիկանության սահմանափակ թվով ծառայողների: Մեկ ոստիկան՝ նույն գնդի փոխհրամանատար Արթուր Վանոյանը զոհվել է: Վիրավորվել են եւս չորս ոստիկաններ՝ ոստիկանության գնդապետ Արամ Հովհաննիսյանը, փոխգնդապետ Հրաչ Խոստեղյանը, ոստիկանության ենթասպա Գագիկ Մկրտչյանը, օպերատոր Ռոբերտ Հայրապետյանը, նաեւ ՊՊԾ գնդի գրոհին մասնակցած անձանցից մեկը՝ Թաթուլ Թամրազյանը:
ՊՊԾ գնդի գրավումից հետո փակվել է Մովսես Խորենացի փողոցը, Սարի թաղի բնակիների համար տեղաշարժման խնդիրներ են առաջացել: