Հայաստանի եւ Սլովակիայի հավաքականների խաղով մեկնարկեց ֆուտբոլի Եվրոպայի առաջնության ընտրական փուլի 3-րդ տուրը B խմբում: Երկրների հավաքականներն առաջին անգամ էին հանդիպում: Աշխարհի առաջնության մասնակից Սլովակիայի հավաքականը երեւանյան խաղից առաջ ուներ հարյուրտոկոսանոց արդյուն`6 միավոր երկու խաղում եւ զբաղեցնում էր երկրորդ տեղը:
6 միավոր ունի նաեւ խմբի առաջատար Իռլանդիան, որն այսօր Դուբլինում կխաղա ռուսների հետ: Սլովակիայի հավաքականը Վլադիմիր Վայսի գլխավորությամբ Հանրապետական ստադիոնում աշխարհհի առաջնության մասնակցի խաղ չցուցադրեց եւ արդեն 23-րդ րոպեին գնդակ բաց թողեց: Գերազանց հարվածով աչքի ընկավ Յուրա Մովսիսյանը: Առաջին խաղակեսում սլովակները հավասարեցրին հաշիվը գլխավոր մարզչի որդու` Վլադիմիր Վայսի գոլի շնորհիվ:
Երկրորդ խաղակեսում Հայաստանի հավաքականը շարունակեց խաղալ հարձակողական ոճով եւ շատ արագ հաջողության հասավ: 50-րդ րոպեին Գեւորգ Ղազարյանն առաջ մղեց Հայաստանի հավաքականին: Հանդիպման նախավերջին րոպեին իր գնդակը խփեց Հենրիխ Մխիթարյանը, որը տուգանային հրապարակի գծից հուժկու հարվածով ոչ մի շանս չտվեց դարպասապահ Մուխային: Հայաստանի հավաքականն առաջին հաղթանակը տարավ Եվրո-2012-ի ընտրական մրցաշարում եւ 4 միավորով բարձրացավ երրորդ տեղ` շրջանցելով Ռուսաստանին, որը երկու խաղից հետո երեք միավոր ունի: Հայաստան – Սլովակիա հանդիպման ընթացքին տրիբունայից հետեւում էր նաեւ Հայաստանի նախագահ Սերժ Սարգսյանը: