Հայաստանի նախագահն արդեն իսկ զիջումների է գնացել՝ հայտարարելով, որ պատրաստ է Ղարաբաղի հարցը քննարկել Ժիրայր Սեֆիլյանի հետ։ Այս մասին հուլիսի 25-ին՝ մամուլի ասուլիսի ժամանակ, ասել է քաղտեխնոլոգ Վիգեն Հակոբյանը՝ անդրադառնալով Ոստիկանության ՊՊԾ գունդը գրավելուն եւ դրան հաջորդած իրադարձություններին։
Նա կարծում է, որ նախագահն ասես մտադիր չէ ուժի դիմել։ Այս պահին խորը բանակցային գործընթաց է ընթանում։ «Մենք չենք կարող ասել, թե ով է վարում բանակցությունները։ Ես կարծում եմ, որ բանակցող կողմերից մեկը Ժիրայր Սեֆիլյանն է։ Մյուս կողմից, այսինքն՝ իշխանությունից, դժվարանում եմ ասել, թե ով է բանակցում»,– ասել է Հակոբյանը։
Քաղտեխնոլոգը նշել է, որ Սեֆիլյանը կարող է հանգուցալուծել այս լարված իրավիճակը։ «Եթե պայմանավորվածության հասնեն ղարաբաղյան հարցի լուծման անցանկալի սցենարների սառեցման կամ հետաձգման հարցով, մնացած հարցերը կլուծվեն։ Քաղբանտարկյալների հարցը ես այդքան խնդրահարույց չեմ համարում իրականացման տեսակետից»,– ընդգծել է Վիգեն Հակոբյանը՝ հավելելով, որ կողմերից յուրաքանչյուրը փորձում է «պահպանել դեմքը»։
Հիշեցնենք, որ հուլիսի 24-ին ղարաբաղյան պատերազմի հերոս գեներալ Վիտալի Բալասանյանը հայտարարություն էր արել, որում մասնավորապես ասել էր, որ ՀՀ նախագահ Սերժ Սարգսյանը պատրաստակամություն է հայտնել զրուցել Ժիրայր Սեֆիլյանի հետ, եթե ՊՊԾ գունդը գրաված զինված խմբի անդամները զենքը վայր դնեն եւ հանձնվեն իշխանություններին։