Ոստիկանության ՊՊԾ գնդի գրավումից հետո Հայաստանի որոշ ուժային կառույցներում, օրինակ, այդ նույն Ոստիկանությունում, փոփոխություններ տեղի կունենան։ Այս մասին հուլիսի 25–ին՝ մամուլի ասուլիսի ժամանակ, ասել է քաղտեխնոլոգ Վիգեն Հակոբյանը։
Նրա խոսքով՝ հուլիսի 17-ին ՊՊԾ գնդի գրավմանը հաջորդած իրադարձությունները շատ բազմաշերտ են։ «Եվ շատերը, այդ թվում՝ երկրի ներսում, փորձում են օգտվել այդ գործընթացներից»,– ասել է Հակոբյանը եւ հավելել, որ ընդհանրապես զարմանալի չէ, որ նման իրադարձություններին փորձում են մասնակցել նորաթուխ քաղաքական ուժերը, քանի որ նման գործընթացների ժամանակ կարող են հեղափոխական, ընտրական կամ այլ սցենարներ լինել, իսկ քաղաքական ուժերը պետք է փորձեն ինքնադրսեւորվել։
«ՀՀ նախկին արտգործնախարար, «Համախմբում» կուսակցության նախագահ Վարդան Օսկանյանը փորձեց արձանագրել իր ներկայությունը քաղաքական դաշտում։ Մենք բոլորս, բնականաբար, հասկանում ենք, որ դա քաղաքական PR էր։ Ինչ վերաբերում է ընդդիմադիր պատգամավոր Նիկոլ Փաշինյանին, ապա հասարակության վստահությունը նրա նկատմամբ ավելի մեծ է, քան Օսկանյանի։ Փաշինյանը փորձեց իրականացնել իր թեզիսը, որ Հայաստանում կա ընդդիմություն, եւ այդ ընդդիմությունն ինքն է եւ իր համախոհները»,– ասաց Վիգեն Հակոբյանը։
Հիշեցնենք, որ ՀՀ Ոստիկանության ՊՊԾ գնդի գրավումը տեղի է ունեցել հուլիսի 17-ին: Հուլիսի 23-ին ազատ են արձակվել վերջին պատանդները ՝ երկու բարձրաստիճան ոստիկաններ: Զինված խմբի անդամների պահանջները նույնն են մնում՝ արմատական ընդդիմադիր Ժիրայր Սեֆիլյանի ազատ արձակումը ու երկրի ղեկավարության հրաժարականը:
