Խորենացի փողոցում ավարտվեց ի պաշտպանություն ՊՊԾ գունդը գրաված «Սասնա ծռեր» խմբի կազմակերպված երթը։
«Հիմնադիր խորհրդարանի» ներկայացուցիչ Ալեք Ենիգոմշյանը հայտարարեց, որ ժողովուրդն իշխանություններին ժամանակ է տալիս մինչեւ առավոտյան ժամը 9-ը։ Այդ ժամին նախաձեռնող խումբն ու քաղաքացիները իրենց հետ սնունդ կբերեն Խորենացի փողոց, իսկ ԱԺ պատգամավոր Զարուհի Փոստանջյանին խնդրեցին կապ պահել ոստիկանության ներկայացուցչի հետ, որ այդ սնունդի փոխանցումը «Սասնա ծռերին» րոպեների ընթացքում դառնա իրականություն։
Ենիգոմշյանը նաեւ պահանջեց, որ վերստին հաստատվի «Սասնա ծռերի» հետ հեռախոսակապը, եւ մինչեւ նրանց՝ այնտեղից դուրս գալը անխափան լինի։ «Սրա հետ մեկտեղ չենք մոռանում, որ այս ամենը սկսվել է որակական փոփոխությունների համար։ Մեր ընկերները կարող են օրերով քաղցած մնալ, մեր ամենակարեւոր խնդիրը վարչախմբի հեռացումն է»,- ասաց նա՝ Սերժ Սարգսյանին հորդորելով լրջորեն մտածել իր ապագա քայլերի մասին. «Դա բացարձակապես այլ բան չի նշանակում, քան իր համար հեռացման լավագույն ձեւի մասին»։
Ավելի վաղ Ենիգոմշյանը հայտարարել էր, թե «Սասնա ծռերն» արդեն երկու օր զրկված են սնունդից, կապից, էլեկտրականությունից, բուժօգնությունից։
