Հայաստանում ստեղծված իրավիճակի հանգուցալուծման վատագույն տարբերակը կլինի արյունահեղությունն ու երկրի կտրուկ թուլացումը՝ դրա հնարավոր հետեւանքներով։ Այս մասին հուլիսի 26-ին՝ մամուլի ասուլիսի ժամանակ, ասել է կառավարման ոլորտի փորձագետ Հարություն Մեսրոպյանը՝ անդրադառնալով հուլիսի 17-ին Ոստիկանության ՊՊԾ գնդի գրավմանը եւ դրան հաջորդած դեպքերին։
Նա նշեց, որ լավագույն սցենարը թիմի ձեւավորումն է, որը հենց այսօր կարող է իր ձեռքը վերցնել երկրի կառավարումը։ «Այստեղ ես մտավախություն ունեմ, որ նման թիմ չկա։ Եվ տեղի ունեցող դեպքերը փաստացի ապացուցում են դա»,– ընդգծեց Մեսրոպյանը։ Նրա խոսքով՝ անհրաժեշտ է բացառել նաեւ սադրիչ ելույթները, քանի որ դրանց հետեւանքները ոչ ոք չի կարող կանխատեսել։ «Վարկաբեկված գործիչներն ուղղակի իրավունք չունեն մոտ գնալ այդ գործընթացներին, քանի որ դա ժողովրդի մոտ միայն խառնաշփոթ կառաջացնի»,– հավելել է փորձագետը։
Անդրադառնալով հարցին, թե Հայաստանում կան արդյոք չվարկաբեկված գործիչներ, Հարություն Մեսրոպյանն ասաց. «Իսկ միթե մենք նման խնդիր ենք դրել՝ գտնել չվարկաբեկված գործիչների։ Միթե մենք խնդիր ենք դրել հրավիրել պրոֆեսիոնալների։ Մեզ նոր մտածողություն է պետք։ Մենք պետք է գտնենք չվարկաբեկված գործիչների։ Վերջին 25 տարում մենք արդեն պետք է անեինք դա»։
