ՀՀ ոստիկանության պարեկապահակային գունդը «Սասնա ծռեր» խմբավորման կողմից  գրավելուց եւ ոստիկանության ու ցուցարարների միջեւ տեղի ունեցած բախումից հետո  հուլիսի 26-ի դրությամբ մայրաքաղաքի տարբեր բժշկական հաստատություններում բուժում  է ստանում 13 անձ, որից 5-ը` ոստիկան: Այս մասին NEWS.am-ի հետ զրույցում ասաց ՀՀ առողջապահության նախարարության հասարակայնության հետ կապերի վարչության պետ Անահիտ Հայթայանը:

Նրա խոսքով՝ բոլոր տուժածներին ողջ ծավալով ցուցաբերվում է անհրաժեշտ բուժօգնություն։ Այս պահի դրությամբ ծանր կայուն է գնահատվում հուլիսի 17-ին հրազենային վիրավորում ստացած ոստիկանի վիճակը, որ գտնվում է Համալսարանական թիվ մեկ հիվանդանոցի Վերակենդանացման բաժանմունքում: Ծանր է նաեւ «Սասնա ծռերի» անդամ 26-ամյա Թաթուլ Թամրազյանի վիճակը, ով եւս վիրավորվել է հուլիսի 17-ի գրոհի ժամանակ:

Նշենք, որ հուլիսի 26-ի գիշերը ժամը 2-ի սահմանում ոստիկանների եւ «Սասնա Ծռերի»  միջեւ տեղի ունեցած հրաձգության հետեւանքով վիրավորված  50-ամյա Աշոտ Պետրոսյանի եւ 29-ամյա Հովհաննես Հարությունյանի վիճակը միջին ծանրության է:

Ավելի վաղ NEWS.am-ը հայտնել էր, որ ըստ «Սասնա ծռեր» խմբավորման հայտարարության ՝ գիշերը ժամը 2-ի սահմաններում տարածքին հարակից ոստիկանական պատնեշից դավադրաբար կրակ են բացել, որի արդյունքում ոտքերից վիրավորվել են Սասնա Ծռեր խմբի անդամներ Աշոտ Պետրոսյանը եւ Հովհաննես Հարությունյանը:

Ոստիկանությունն էլ հայտարարել է, որ ժամը 01.00-ի սահմաններում գնդի տարածքից դուրս է եկել ոստիկանության «ՈՒԱԶ» մակնիշի ավտոմեքենան ու շարժվել ոստիկանության Էրեբունու բաժնի ուղղությամբ՝ դեպի արգելապատնեշում կանգնած ոստիկանական շղթան։ Իրավապահները մեքենայի ընթացքը կասեցնելու համար կրակ են բացել մեքենայի շարժիչի վրա։ Մեքենան ձախ կիսաշրջադարձ է կատարել, հնչել են կրակոցներ, որից հետո իրավապահները կրակ են բացել մեքենայի անվադողերի ուղղությամբ։

Հրաձգության հետեւանքով մեքենայում գտնվող երեք անձանցից երկուսը ոտքերի վնասվածքներ են ստացել եւ նահանջել գնդի տարածք։