Երեւանի Էրեբունի եւ Նուբարաշեն վարչական շրջանների ընդհանուր իրավասության դատարան այս օրերին մուտք գործելու հնարավորություն ունեն միայն փաստաբանները, դատախազները, տուժողներն ու վկաները միայն հատուկ փաստաթղթերի առկայությամբ: Տարածքը հսկող ոստիկանները սա պայմանավորում են այն հանգամանքով, որ դատարանը գտնվում է գրավված ՊՊԾ գնդի մոտ եւ այս կերպ քաղաքացիների անվտանգությունն են ապահովում:
Ոստիկանության պարեկա- պահակային գունդը գրավել են հուլիսի 17-ին: Երկու օր անց դատարանում տեղի է ունեցել «Երրորդմասցի Լյովիկի» եւ ընկերների սպանության գործով դռնբաց դատական նիստը: Ցանկացողներն անարգել կարողացել են մասնակցել նիստին: Մեկ շաբաթ անց՝ հուլիսի 26-ին, պարզվում է՝ դռնբաց դատական նիստին կարող են մասնակցել միայն փաստաբանները, դատախազները, տուժողներն ու վկաները, եթե համապատասխան փաստաթուղթ ունեն:
«Դատարանի հրամանն է այդպիսին»,- մեր հարցին ի պատասխան ասացին արգելապատնեշի մոտ կանգնած դատական կարգադրիչներն ու հեռացան՝ հաշվի չառնելով, որ դռնբաց դատական նիստին ներկա գտնվելու իրավունք ունի յուրաքանչյուր ոք: