Թեպետ ոստիկանությունը Երեւանի Խորենացի փողոցի ցուցարարներին զգուշացրել էր հավաքը տեղափոխել այլ վայր, սակայն, այսօր՝ հուլիսի 26-ին, փողոցը կրկին մարդաշատ է: NEWS.am-ի թղթակցի փոխանցմամբ, հավաքին մասնակցելու համար քաղաքացիները գալիս են Խորենացի փողոց, դրա հետ մեկտեղ ոստիկանության մեծ ուժեր են բերվել տարածք: Այս պահին փողոցում իրադրությունը խաղաղ է, քաղաքացիները սպասում են առաջիկայում սկսվելիք հավաքին: Հանրահավաքին մասնակցում է նաեւ «Ժառանգություն» կուսակցության ղեկավար Րաֆֆի Հովհաննիսյանը։
Խորենացի փողոցի երթեւեկությունն այս պահին փակվել է:
Ավեի վաղ ոստիկանությունը հաղորդագրություն էր տարածել եւ զգուշացրել, որ ցուցարարները Խորենացի փողոցից իրենց հավաքը տեղափոխեն այլ վայր: ՀՀ ոստիկանությունը պահանջում է հավաքի փաստացի ղեկավարներից՝ սեղմ ժամկետում հավաքը տեղափոխել մեկ այլ վայր, որտեղ խաղաղ հավաքներին աջակցելու ՀՀ ոստիկանության պարտականությունների սահմաններում հնարավոր կլինի ապահովել հավաքի մասնակիցների անվտանգությունը: Հակառակ դեպքում ՀՀ ոստիկանությունը չի ունենալու այլ միջոց, քան օրենքով սահմանված կարգով դադարեցնել այդ հավաքը։
Նշենք, որ ցուցարարները հայտարարել են, որ չեն պատրաստվում ենթարկվել ոստիկանության պահանջներին եւ այսօրվա հավաքը նույնպես պատրաստվում են անցկացնել Խորենացի փողոցում: