Նախօրեին ուշ երեկոյան վիրավորված, «Սասնա ծռեր» խմբի անդամ Արամ Մանուկյանի վիճակի մեջ դրական տեղաշարժ կա, արհեստական շնչառության ապարատն անջատել են: Այս մասին լրագրողների հետ զրույցում ասել է «Էրեբունի» բժշկական կենտրոնի Ինտենսիվ թերապիայի բաժանմունքի գիտական ղեկավար Հարություն Մանգոյանը՝ ներկայացնելով վիրավորների վիճակը:

«Արամ Մանուկյանի գիտակցությունը տեղն է, սակայն վիճակը շարունակում է կայուն ծանր մնալ: Պավլիկ Մանուկյանը նույնպես ծանր վիճակում է, արհեստական շնչառության ապարատը դեռ միացված է, գիտակցությունը վերականգնվում է: Հաշվի առնելով վնասվածքները՝ մի փոքր ավելի երկար նա կմնա միացված արհեստական շնչառության պարատաին»,- ասաց Հարություն Մանգոյանը:

Վիրավորված ոստիկանի վիճակն էլ միջին ծանրության է:

Նշենք, որ Պավել Մանուկյանը հիվանդանոց է ընդունվել զույգ ազդրերի հրազենային վնասվածքներով, աջ ազդոսկրի բազմաբեկոր կոտրվածքով։ Կատարվել է վերքի առաջնային վիրաբուժական մշակում, նաեւ ոսկրի ֆիքսացիա։ Այժմ Պավել Մանուկյանը տեղափոխվել է վերակենդանացման բաժանմունք։

Արամ Մանուկյանը ընդունվել է ձախ ազդրի հրազենային վնասվածքով։ Կատարվել է վերքերի առաջնային վիրաբուժական մշակում, ոսկրերի ֆիքսացիա։