Աշխարհում նման երեւույթ չի եղել, անգամ պատերազմի տարիներին, որ բուժաշխատողներին պատանդ վերցնեն։ Այս մասին հուլիսի 27-ին ասել է Հայաստանի գլխավոր ինֆեկցիոնիստ Արա Ասոյանը։
Նրա խոսքով՝ անգամ եթե նման դեպքեր են եղել, բժիշկներին անմիջապես ազատ են արձակել։ «Նման բան չի եղել ո՛չ ղարաբաղյան պատերազմի ժամանակ, ո՛չ Երկորրդ համաշխարհային պատերազմի ժամանակ ֆաշիստական Գերմանիայի կողմից եւ ո՛չ էլ անգամ Չիլիում Պինոչետի կառավարման օրոք է եղել նման բան, որ բուժաշխատողի գլխից մի մազ պակասի։ Այդ պատճառով ես ե՛ւ զարմացած եմ, ե՛ւ վրդովված։ Դիմում եմ ՊՊԾ գունդը գրաված տղաներին. ձեզնից ոմանք ինձ շատ լավ գիտեն հայտնի պատճառներով։ Ես խնդրում եմ անհապաղ ազատե՛ք այդ բժիշկներին։ Եթե պետք է, ես պատրաստ եմ լինել նրանց տեղում, բայց անհապաղ ազատե՛ք նրանց։ Դա ուղղակի հային ոչ հարիր վերաբերմունք է բուժաշխատողի նկատմամբ»,– ասել է Արա Ասոյանը։
Հիշեցնենք, որ Առողջապահության նախարարության մամուլի ծառայության փոխանցմամբ՝ իրենց մասնագիտական պարտականությունները կատարելիս զինված խմբի կողմից պատանդ են վերցվել բժիշկներ Նորայր Թեւանյանն ու Սալվադոր Չեխոյանը, բուժեղբայր Դավիթ Տոնոյանը եւ բուժքույր Մալինա Մարգարյանը։
