Երթից հետո այս գիշեր ձերբակալվել է Հակաճգնաժամային նախաձեռնող խմբի եւ «Հիմնադիր խորհրդարանի» անդամ Արմեն Միքայելյանը: Այս մասին այսօր՝ հուլիսի 27-ին, լրագրողների հետ հանդիպմանն ասաց «Հիմնադիր խորհրդարանի» անդամ Ալեք Ենիգոմշյանը:
«Արմեն Միքայելյանը ձերբակալվել է երեկ ծնողների, կնոջ ու երեխաների հետ Խորենացիից տուն վերադառնալիս: Նրա գրպանը ատրճանակ են գցել եւ նա ձերբակալված է»,- ասաց նա:
Հարցին, թե ինչու համակարգող խորհուրդը չմնաց գիշերը եւ մարդկանց բերման ենթարկեցին, Ալեք Ենիգոմշյանը պատասխանեց. «Ես վստահ եմ, որ ոչինչ չի փոխվել: Մենք լսեցինք, որ կա նման սադրանք: Բացի այն, ինչ տեղի ունեցավ գնդի ներսում, կա հստակ միտում. սադրանքների միջոցով ծեծ ու ջարդ հրահրել եւ իրագործել այնտեղ հավաքված ժողովրդի շրջանակներում: Այդ պահի լրջությունը հաշվի առնելով՝ գնացինք այնպիսի քայլի, որ իշխանության սադրանքը չիրականանա: Պայքարը շարունակվում է, տղաներն ամուր են»:
Ալեք Ենիգոմշյանը հայտնեց, որ հավաքի տեղի փոփոխության խնդիր չկա, հավաքվելու կոչն ուժի մեջ է. «Մենք արդեն անցնում ենք երկրորդ փուլ: Առաջին փուլը «Սասնա ծռեր» խմբի քաղաքական լեգիտիմացման փուլը ամբողջությամբ իրականացվել է: Կա «Սասնա ծռերը» եւ համարյա ամբողջ ժողովուրդը, որ սատար է կանգնում նրանց: Այսօր չկա Հայաստանում մեկը, բացի ռեժիմի ներկայացուցիչներից եւ նրանց մունետիկներից, որոնք իրենց աջակցությունը չհայտնեն «Սասնա ծռերին»: Հենց այդ պատճառով անցնում ենք երկրորդ փուլին, որը հիմնվելով այդ բացարձակ ժողովրդական աջակցության վրա, այդ խնդիրը հանրահավաքի ժամանակ կհստակեցվի, թե ինչ ուղղությամբ կգնա պայքարը այսուհետեւ»:
Միեւնույն ժամանակ, «Հիմնադիր խորհրդարանի» անդամն ընդգծեց, որ իրենք չեն ասում՝ իրենք են ղեկավարությունը, սա ժողովրդական պայքար է, որը պետք է ընդամենը համակարգել:
«Բոլոր նրանք, որոնք պատրաստ են պայքարելու, շարունակելու են պայքարը, անկախ նրանից, թե նախաձեռնող խորհուրդն ինչ կասի կամ կանի: Կարեւոր է, որ որոշումները լինեն ներդաշնակ ու համակարգված, բայց ոչ վերեւից թելադրված»,- ասաց նա: