«Մյունխենի հրաձիգը»՝ իրանական ծագմամբ 18-ամյա գերմանացի Ալի Դավիդ Սոնբոլին ծայրահեղ աջ է եղել եւ հպարտացել, որ Ադոլֆ Հիտլերի հետ նույն օրը՝ ապրիլի 20-ին է ծնվել: Այս մասին գրում է ՌԻԱ Նովոստին՝ վկայակոչելով Frankfurter Allgemeine Zeitung-ը:
Երիտասարդի շրջապատի անձանց խոսքով՝ Սոնբոլին հպարտացել է, որ արիացի է: Նացիստները հենց Իրանն էին համարում արիացիների հայրենիքը, իսկ գերմանացիներին Հիտլերը նրանց ժառանգներն էր համարում: Իսկ թուրքերին եւ արաբներին Սոնբոլին ատել է՝ «իրեն նրանցից վեր համարելով»:
Այսպիսով, ըստ պարբերականի, քննիչները ենթադրում են, որ այդ պատճառով է Սոնբոլին մտածված կերպով կրակել արտաքինով օտարերկրացիների նման մարդկանց ուղղությամբ: Հրաձիգի բոլոր 9 զոհերը միգրանտներ են եղել, 6-ը՝ 14-17 տարեկան անչափահաս, երկուսը՝ 19 եւ 20 տարեկան: Երեք պատանիները թուրքական արմատներ են ունեցել, իսկ 45-ամյա կինը նման է եղել թրքուհու:
Հիշեցնենք, որ հուլիսի 22-ին Մյունխենի առեւտրի կենտրոններից մեկում Սոնբոլին կրակ էր բացել մարդկանց ուղղությամբ՝ սպանելով 9 մարդու եւ վիրավորելով 35-ի: Դրանից հետո հրաձիգն ինքնասպան է եղել: