Վրաստանը ծրագրում է Շանհայում նախանշված վրաց-չինական ներդրումային համաժողովի ժամանակ 7 մլրդ դոլարի նախագծեր ներկայացնել: «Բիզնես-Գրուզիա»-ի փոխանցմամբ՝ այս մասին հավաքից առաջ հայտարարել է Վրաստանի էկոնոմիկայի նախարար Դմիտրի Կումսիշվիլին:
«Վրաստանը տարածաշրջանում միակ երկիրը կլինի, որը Չինաստանի հետ ազատ առեւտրի մասին համաձայնագիր կունենա: Երկու երկրների կառավարությունների միջեւ համապատասխան բանակցությունները պետք է ավարտվեն մինչեւ այս տարեվերջ»,- ասել է Կումսիշվիլին:
Էկոնոմիկայի նախարարը հաղորդել է, որ Վրաստանի եւ Չինաստանի միջեւ առեւտրի եւ ներդրումային միասնական խորհուրդի ստեղծման մասին համաձայնություն է ձեռք բերվել, որի հիմնական նպատակը կլինի գործարարների մասին տեղեկատվության փոխանակումը, ներդրումների ներգրավումը, առեւտրի զարգացումը եւ բոլոր այն խնդիրների լուծումը, որոնք կարող են առաջանալ այդ ուղղություններում:
