Ազատության հրապարակում մեծ բազմություն է հավաքվել՝ ի պաշտպանություն ՊՊԾ գունդը գրաված «Սասնա ծռեր» խմբի։
NEWS.am-ի թղթակցի փոխանցմամբ, մարդիկ վիճել են ԱԻՄ նախագահ Պարույր Հայրիկյանի հետ, նրան մեղադրել հուլիսի 26-ի հանրահավաքը տուն ուղարկելու եւ իշխանությունների կամքը կատարելու մեջ։ Հայրիկյանը ոչ պակաս բորբոքված հայտարարում էր, թե իրեն մեղադրողները «ԿԳԲ-ի ագենտներ են, որոնք կատարում են Սերժ Սարգսյանի հրահանգը»։
Ալբերտ Բաղդասարյանը հայտարարեց, թե նախաձեռնող խումբը «գլխատվել է», ամեն րոպե կարող են բերման ենթարկել իրեն եւ խմբի՝ ազատության մեջ մնացած անդամներին։ Նա խոստովանել է, որ նախաձեռնող խումբը հեղինակության կորուստ է ունեցել երեկ կատարած քայլերի համար, սակայն պնդել է, թե այդկերպ կանխել են իշխանությունների սադրանքը։ Նա նշել է, որ հույս ունեն, թե իրենց կմիանան ԱԺ պատգամավորները, որոնք անձեռնմխելիություն ունեն։ Բաղդասարյանը կոչ է արել եվրոպական երկրներին եւ Միացյալ Նահանգներին՝ խելքի գալ, աջակցել ընդդիմությանը, այլապես Ռուսաստանը նրանց դուրս կմղի Հարավային Կովկասից։
Նշենք, որ հավաքվածները պահանջել են, որ հրապարակ գա եւ բեմ բարձրանա ԱԺ պատգամավոր Նիկոլ Փաշինյանը։
Բաղդասարյանը նշել է, թե ամեն օր, ժամը 19։30-ին պետք է հավաքվել Ազատության հրապարակում՝ անկախ նախաձեռնող խմբից։ Դա նույնպես հարուցել է հավաքվածների դժգոհությունը, նրանք երթ են պահանջել։