NEWS.am-ի թղթակիցը հայտնում է, որ երթը Ազատության հրապարակից հասել է Խորենացի փողոց, որտեղ ոստիկանությունը նախորդ օրերից մի քանի անգամ ավելի շատ ուժեր է կենտրոնացրել։ Ոստիկանները զինված են վահաններով, մահակներով, սաղավարտներով։
Հասնելով Խորենացի փողոց՝ երթի մասնակիցները հայտարարեցին, թե իրենց ինքնաբուխ երթը պահանջում է, որ ազատ արձակեն ձերբակալվածներին։
Խորենացի փողոցում երթի մասնակիցները բարձրաձայնեցին իրենց պահանջները՝ ազատել ձերբակալվածներին, իշխանությունների հրաժարական, ձեւավորել ժողովրդի կառավարություն, ապա հայտարարեցին, որ նստացույց են սկսում, 45 րոպե ժամանակ են տալիս իշխանություններին՝ իրենց պատասխան տալու համար։
Հակաճգնաժամային նախաձեռնող խմբի որեւէ անդամ առաջին շարքերում չի գտնվում, երթի կառավարումն իրենց ձեռքն են վերցրել բոլորովին անծանոթ երիտասարդներ։