«Սասնա ծռեր» խմբի անդամ Աշոտ Պետրոսյանն իրեն առաջադրված մեղադրանքը չի ընդունում: Այս մասին NEWS.am-ին ասաց նրա փաստաբան Արայիկ Պապիկյանը:
«Քիչ առաջ եմ հանդիպել իմ պաշտպանյալին, նա ինձ ասաց, որ իր հայրենիքի համար է պայքարում: Ինչ վերաբերում է ոստիկանության տարածած հաղորդագրությանը հուլիսի 26-ի գիշերը տեղի ունեցածի վերաբերյալ, երբ Պետրոսյանը վիրավորվել է, իրականությանը չի համապատասխանում: Աշոտ Պետրոսյանն ինձ ասել է, որ ոստիկանների դեմ որեւէ հարձակում կամ գործողություն իրենք չեն արել»,- ասաց Արայիկ Պապիկյանը:
Փաստաբանի խոսքով՝ Պետրոսյանի վիճակը բավարար է, «Դատապարտյալների հիվանդանոց» քրեակատարողական հիմնարկում համապատասխան բուժօգնություն է ստանում:
Նշենք, որ Աշոտ Պետրոսյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասի 1-ին կետով (Շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից): Նա կալանավորված է:
Ավելի վաղ NEWS.am-ը հայտնել էր, որ ըստ «Սասնա ծռեր» խմբավորման հայտարարության՝ հուլիսի 26-ին ժամը 02:00-ի սահմաններում տարածքին հարակից ոստիկանական պատնեշից կրակ են բացել, որի արդյունքում ոտքերից վիրավորվել են «Սասնա Ծռեր» խմբի անդամներ Աշոտ Պետրոսյանը եւ Հովհաննես Հարությունյանը:
Ոստիկանությունն էլ հայտարարել է, որ ժամը 01.00-ի սահմաններում գնդի տարածքից դուրս է եկել ոստիկանության «ՈՒԱԶ» մակնիշի ավտոմեքենան ու շարժվել ոստիկանության Էրեբունու բաժնի ուղղությամբ՝ դեպի արգելապատնեշում կանգնած ոստիկանական շղթան։ Մեքենան ընդհուպ մոտեցել է շղթային, ի պատասխան՝ հնչել են կրակոցներ, որոնց իրավապահները չեն պատասխանել։ Հրաձգության հետեւանքով մեքենայում գտնվող երեք անձանցից երկուսը ոտքերի վնասվածքներ են ստացել եւ նահանջել գնդի տարածք։ Ներկայումս երկու վիրավորները՝ Աշոտ Պետրոսյանն ու Հովհաննես Հարությունյանը, գտնվում են հիվանդանոցում եւ ստանում են անհրաժեշտ բժշկական օգնություն։