Երեւանի Խորենացի փողոցում հուլիսի 27-ին քաղաքացիներին բերման ենթարկելը նպատակ ուներ կանխել բազմամարդ խաղաղ հավաքը: Այս մասին այսօր` հուլիսի 28-ին, լրագրողների հետ հանդիպմանն ասաց «Նոր Հայաստանի» խորհրդի անդամ Անդրիաս Ղուկասյանը:
«Հուլիսի 26-ի բազմամարդ երթը մեծ խուճապ առաջացրեց ռեժիմի մոտ: Հաջորդ օրը Խորենացի փողոցից բերման ենթարկվեցին քաղաքացիներ, նույնիսկ այլ երկրների քաղաքացիներ, այդ թվում կանադահայ դերասանուհի Արսինե Խանջյանը: Բերման ենթարկվեցին նաեւ Հակաճգնաժամային խորհրդի անդամների մեծ մասը: Այս պահի դրությամբ խորհրդի երեք անդամներ են ձերբակալված, կարելի է ասել, որ իշխանությունները նրանց պատանդ են վերցրել, որպեսզի կանխարգելեն մեծածավալ շարժման զարգացումը»,-ասաց նա:
Անդրիաս Ղուկասյանը նշեց, որ «Հիմնադիր խորհրդարանի» անդամ Ալեք Ենիգոմշյանի ձերբակալումով դժվարին իրավիճակ է ստեղծվել, քանի որ Ալեք Ենիգոմշյանը կամուրջ էր հանդիսանում ապստամբների եւ հանրության միջեւ. «Այս պահի դրությամբ այդ ֆունկցիայի բացակայությունն անբարենպաստ վիճակ է ստեղծում: Պահանջում ենք, որ նա եւ մյուս բերման ենթարկվածներն անհապաղ ազատ արձակվեն: Քաղաքացիների վստահությունը կրող մարդիկ մեկուսացվում են եւ ավելի բարդ է դառնում այդ գործընթացը կառավարելն ու հսկելը, սակայն, մենք շարունակելու ենք մեր պայքարը»:
Անդրիաս Ղուկասյանը քաղաքացիներին կոչ արեց այսօր ժամը 19:30-ին հավաքվել Երեւանի Ազատության հրապարակում, քննարկել երկրում ստեղծված իրավիճակը եւ հետագա քայլերը: Նա նշեց, որ դեռ պարզ չէ` դեպի Խորենացի փողոց երթ կլինի, թե ոչ:
Հակաճգնաժամային խորհրդի անդամ, երգահան Եղիշե Պետրոսյանն էլ նշեց, որ իշխանությունը ուժի ճանապարհն է ընտրել եւ այդպիսով է փորձում լուծում տալ երկրում ստեղծված իրավիճակին. «Մենք չունենք Ազգային ժողով, քանի որ երկրում ստեղծված արտակարգ իրավիճակում Ազգային Ժողովը ժամանակ չի գտնում: Մենք արտակարգ իրավիճակների ռեժիմում ենք եւ այս իրավիճակում գործում է միայն ոստիկանությունն ու ԱԱԾ-ն»:
Հիշեցնենք, որ հուլիսի 27-ի ցերեկվանից քաղաքացիների էին բերման ենթարկում Խորենացի փողոցից: Բերման ենթարկվածների մեջ էին նաեւ նախաձեռնող խմբի անդամները, կանադահայ դերասանուհի Արսինե Խանջյանը: