«Սասնա ծռերի» անդամներ Գագիկ Եղիազարյանին եւ Արամ Հակոբյանին խոշտանգումների են ենթարկել: Այս մասին այսօր` հուլիսի 28-ին, լրագրողների հետ հանդիպմանն ասաց «Նոր Հայաստանի» խորհրդի անդամ Անդրիաս Ղուկասյանը` նշելով, որ նման հայտարարություն է արել նրանց փաստաբան Լուսինե Հակոբյանը: Նա նշեց, որ Գագիկ Եղիազարյանի եւ Արամ Մանուկյանի մոտ մարմնական վնասվածքներ են հայտնաբերվել եւ փաստաբանը դիմել է, որպեսզի դատաբժշկական փորձաքննության ենթարկվեն նրանք:
«Եթե եղել են ԱԱԾ մեկուսարանում եւ նրանց նկատմամբ բռնություն է կիրառվել այդ ընթացքում, նշանակում է, որ Սահմանադրությունն այս երկրում չի գործում, իսկ եթե նրանց ոստիկանության ՊՊԾ գնդի տարածքից հեռացնելու ժամանակ է եղել, դա էլ փաստում է, որ նրանք ոստիկանությանը չեն հանձնվել, այլ բռնի ուժով են հեռացրել»:
Ավելի վաղ NEWS.am-ը հայտնել էր, որ ըստ ոստիկանության, հուլիսի 26-ի գիշերը ժամը 01.00-ի սահմաններում ՊՊԾ գնդի տարածքում իրավապահներին են հանձնվել զինված խմբի անդամներ Գագիկ Եղիազարյանն ու Արամ Հակոբյանը: Տեղի է ունեցել փոխհրաձգություն, որի հետևանքով վիրավորվել է իրավապահներից մեկը, ինչպես և Պավել Մանուկյանն ու նրա որդի Արամը: Երեքն էլ անմիջապես տեղափոխվել են հիվանդանոց:
«Սասնա ծռեր» խմբի անդամ Արեգ Կյուրեղյանի հայրը՝ Արմենակ Կյուրեղյանն էլ այս առնչությամբ ներկայացրել է տեղի ունեցածի մասին որդու պատմածը, ըստ որի հուլիսի 26-ի ուշ երեկոյան Պավլիկ Մանուկյանը փորձել է բանակցել ոստիկանների հետ, որ իրենց տրամադրեն բժիշկ կամ վիրավորին տանեն բուժելու. «Այդ պահին ծանր գնդացրային զինատեսակից կրակ է բացվել Պավլիկ Մանուկյանի վրա: Որդին տեսնելով դա վազել է օգնության եւ նրա վրա եւս կրակ է բացվել: Հետո «Սասնա ծռերի» անդամներից մեկն էլ է վազել օգնության, նրան էլ են վիրավորել: Ծանր վիրավորված Պավլիկին եւ նրա որդուն փորձել են պատգարակներով օգնություն ցուցաբերել, ու նրանց (Գագիկ Եղիազարյանին եւ Արամ Հակոբյանին) այդտեղ «զախվատ» են արել»:
