Ֆրանսիական էներգետիկ հսկայի՝ EDF-ի տնօրենների խորհուրդը հաստատել է 20 տարվա ընթացքում Մեծ Բրիտանիայում առաջին ատոմային էլեկտրակայանի շինարարության նախագիծը: Այս մասին հաղորդում է BBC-ն:
Ընկերությունը ֆինանսավորելու է Սոմերսեթ կոմսությունում կառուցվող 18 մլրդ ֆունտ սթեռլինգի (23.6 մլրդ դոլար) չափով «Հինքլի Փոյնթ» ԱԷԿ-ի շինարարության ծախսերի մեծ մասը, իսկ մեկ երրորդ մասը կտրամադրեն չինացի ներդրողները:
Տնօրենների խորհրդի անդամներից Ժերար Մագնին հրաժարական է ներկայացրել՝ հայտարարելով, որ դա չափազանց ռիսկային նախագիծ է պարտքերի մեջ թաղված ընկերության համար:
Ֆրանսիական լրատվամիջոցների տվյալներով՝ EDF-ն բավարար միջոցներ չունի շինարարության համար եւ ստիպված կլինի օգնություն խնդրել ֆրանսիական իշխանություններից: Ներդրումները թույլ կտան 25 հազար աշխատատեղ ստեղծել կայանի շինարարության ընթացքում, այնուհետեւ ԱԷԿ-ում 900 մարդ կաշխատի: Շահագործման ժամկետը 60 տարի է:
