ՀՀ քննչական կոմիտեիում քննկող զանգվածային անկարգությունների գործով նախօրեին՝ հուլիսի 28-ին, կալանավորվել է նաեւ Հանրային խորհրդի անդամ Արշակ Սադոյանի որդին՝ Արեգը: Այս մասին այսօր՝ հուլիսի 29-ին, լրագրողների հետ հանդիպման ժամանակ նշել է ՀՀ Ոստիկանության ՁՊՎ-ներում վերահսկողություն իրականացնող հասարակական դիտորդական խմբի անդամ Սուրեն Իսկանդարյանը:
Նրա խոսքով, իրենք հանդիպել են Արեգի հետ, նա ներկայացրել է, որ իրեն բերման են ենթարկել Հանրապետության հրապարակից, մեքենայից իջնելիս: Ինչ-որ մեքենայով հետապնդել են, հետո երբ կանգնել է, քաղաքացիական անձինք ուղեկցել են ոստիկանություն, ապա տեղափոխել Կոտայքի մարզի ՁՊՎ: Այնուհետեւ նրան տարել են դատարան ու կալանավորել: «Ոչ մի փաստարկ չկա Արեգի դեմ, ոչ մի տեսագրություն, ինչ-որ խավար նկար է երեւում, որտեղ պարզ չի, որ Արեգը կա այնտեղ»,-ասաց Իսկանդարյանը:
Ասուլիսին ներկա Արշակ Սադոյանը նաեւ մանրամասներ ներկայացրեց՝ նշելով. «Իմ որդու հետ կապված ոչ մի փաստ չունեն: Ոչ ոք չի տեսել, որ Արեգը մեկին հարվածել է: Կա անորոշ մի նկար, որտեղ իր նման մի անձ է երեւում: Բայց քանի որ գլխարկով է, դեմքն էլ չի երեւում, որոշել են, որ Արեգն է: Զարմանալի է, որ այս կարգի ստորություն է թույլ տալիս ՀՀ բարձրագույն իշխանության մարմնի ներկայացուցիչը: Ինձ ասացին փաստաբանի կարիք չկա, շուտով բաց ենք թողնելու: Երեկ առավոտից խոստացել են, որ ժամը 12-ին բաց կթողնեն: Աղվան Հովսեփյանն անձամբ է խոստացել, բայց նա սրիկայություն թույլ տվեց: Հետո ինձ զանգ է տվել փաստաբան Վարդան Զուռնաչյանն ու ասել, որ տանում են դատարան: Ասել են, որ Արեգը հրել է կամ բռնել ոստիկանի վահանը: Մարդուն դատել, 3-7 տարի սռոկ փորձել տալ նրա համար, որ ինչ-որ մեկի վահանից բռնել է, այն էլ չգիտեն ինքն է, թե ոչ, ծիծաղելի է:
Դատի ընթացքում, երբ մենք դատարանում էինք, 8-9 հոգով մտել են մեր տուն, ներկայացրել են խուզարկության վկայական, որտեղ նշված է եղել, որ փնտրում են Արեգ Սադոյանի հագին եղած շապիկն ու գլխարկը: Եկա տեսա, համակարգիչս չկա, առգրավել են: Նույն դատարանի թույլտվությամբ խուզարկել են Արեգի մեքենան, որի մեջ նրան ձերբակալել են: Քննիչն ինձ համարյա լացելով ասում է՝ ես ինչ անեմ, ինձ կարգադրել են: Անգամ մերժել են գրավով ազատ արձակել»:
Հարցին, թե ինչ է պատրաստվում անել, Սադոյանը պատասխանեց. « Նախ փորձելու եմ Հանրային խորհրդում քննարկման առարկա դարձնել, դատապարտող հայտարարություն ընդունել: Սա միայն իմ տղայի դեմ չի կապված, Լեւոն Բարսեղյանի դանակի պատմությունն էլ է ծիծաղելի:
Կա բարձրաստիճան իշխանավորների մի խումբ, որոնք աշխատում են, որ լարվածությունը ավելանա, բերելով փաստարկ, որ այս ինչ պետություն է, որ չի կարողանում հարձակվել ու ազատել ՊՊԾ գունդը: Այդ խումբն ազդեցություն ունի ՀՀ նախագահի վրա, բայց հույս ունեմ, որ երկրի նախագահն այնքան էլ հակված չէ գրոհի: Աղվան Հովսեփյանը մեկն է այդ վտանգավոր անձանցից, որը հրահրում է ուղղակիորեն ներքին արյունոտ բախումներ եւ դա իրականացնում է իր ղեկավարած կառույցի միջոցով: Մարդկանց զանգվածաբար հատուկ բերման են ենթարկում, որ նրանց հարազատները դուրս գան բողոքի եւ այդ բողոքի ժամանակ նոր բախումներով հասցնել խնդրի ուժային կարգավորման»: