Ոտիկանության կողմից 2016թ. հուլիսի 17-27-ն ընկած ժամանակահատվածում ըստ պաշտոնական տվյալների բերման է ենթարկվել ավելի քան 202 քաղաքացի, իսկ համաձայն զանգվածային լրատվամիջոցներով տարածված տեղեկատվության և ականատեսների` ավելի քան 500 քաղաքացի: Այս մասին հաղորդագրություն է տարածել ՀՔԱ Վանաձորի գրասենյակը:
Հաղորդագրությունում, մասնավորապես, ասվում է.
«ՀՔԱ Վանաձորի գրասենյակը հավաքագրել է 2016 թ. հուլիսի 17-ից 27-ը բերման ենթարկված անձանց վերաբերյալ տվյալները` հիմք ընդունելով զանգվածային լրատվամիջոցներով եւ պաշտոնական աղբյուրներով տարածված, ինչպես նաև բերման ենթարկվածների և իրենց հարազատների ու ընկերների կողմից տրամադրված տեղեկությունները:
2016թ. հուլիսի 17-ին «Հիմնադիր խորհրդարանի» փոխնախագահ Վարուժան Ավետիսյանն իր ֆեյսբուքյան էջում տարածել էր հայտարարություն, որով տեղեկացնում էր, որ «Սասնա Ծռեր» խմբավորման անդամները գրավել են Երևան քաղաքում գտնվող հիմնական ոստիկանական բազաներից մեկը:
Այդ հայտարարությամբ ազդարարվում էր զինված ապաստամբության սկիզբը: Խմբավորման պահանջներն էին՝ ազատ արձակել «Հիմնադիր խորհրդարանի» համակարգող Ժիրայր Սեֆիլյանին և մյուս քաղաքական բանտարկյալներին, Սերժ Սարգսյանի հրաժարականը և իշխանության փոխանցումը ժողովրդի վստահության կառավարությանը:
Նույն օրը ՀՀ Ազգային անվտանգության ծառայությունը ևս տարածել է հայտարարություն այն մասին, որ 2016թ. հուլիսի 17-ին զինված խումբը գրավել է ՀՀ Ոստիկանության պարեկապահակետային ծառայության գունդը և պատանդ վերցրել ոստիկանների:
2016թ. հուլիսի 17-ին՝ ՊՊԾ գնդի գրավման ընթացքում, հրազենային վնասվածքի պատճառով մահացել է գնդապետ Արթուր Վանոյանը: Հրազենային վնասվածքեր են ստացել նաև 3-4 ոստիկան, ինչպես նաև «Սասնա ծռեր» խմբի անդամ Թաթուլ Թամրազյանը և Սմբատ Բարսեղյանը: Թաթուլ Թամրազյանը տեղափոխվել է հիվանդանոց, իսկ Սմբատ Բարսեղյանը դեռևս գտնվում է ՊՊԾ գնդի տարածքում:
Բանակցությունների և «Սասնա ծռեր» խմբի բարի կամքի դրսևորման արդյունքում պանտանդ վերցված բոլոր ոստիկանները ազատ են արձակվել մինչև հուլիսի 23-ը:
Հուլիսի 25-ի լույս 26-ի գիշերը հրաձգության հետեւանքով հրազենային վնասվածքներ են ստացել «Սասնա Ծռեր» խմբավորման անդամներ Աշոտ Պետրոսյանն ու Հովհաննես Հարությունյանը, որոնք նույն օրը տեղափոխվել են հիվանդանոց:
Հուլիսի 26-ի լույս 27-ի գիշերը հրաձգության հետեւանքով հրազենային վնասվածքներով հիվանդանոց են տեղափոխվել «Սասնա Ծռեր» խմբավորման անդամներ Պավել Մանուկյանը, Արամ Մանուկյանը: Նույն օրը հրազենային վնասվածք է ստացել նաև մեկ ոստիկան և խմբավորման անդամ Գևորգ Իրիցյանը, որը մնացել է ՊՊԾ գնդի տարածքում:
Այս իրադարձությունը ուղեկցվել է ՀՀ Ոստիկանության կողմից ՀՀ քաղաքացիների նկատմամբ աննախադեպ բռնությունների կիրառմամբ, անհիմն և անօրինական ձերբակալություններով, քաղաքացիների բնակարաններում անօրինական խուզարկություններ իրականացնելով և քաղաքացիներին փողոցից առևանգելով:
Գրանցվել են ակտիվիստների, «Սասնա Ծռեր» խմբավորման ներկայացուցիչների, «Հիմնադիր խորհրդարանի» անդամների և համակիրների, ինչպես նաև քաղաքական բանտարկյաների ընտանիքների անդամների նկատմամբ հետապնդումների և ճնշումների դեպքեր: Մի շարք քաղաքացիների բնակարաններում և ավտոտնակներում իրականացվել են անօրինական, առանց համապատասխան թույլտվության, խուզարկություններ: Մի շարք քաղաքացիներ ուժով բերման են ենթարկվել փողոցներից՝ առանց որևէ բացատրության: Բերման ենթարկելու գործընթացը ուղեկցվել է քաղաքացիների նկատմամբ արժանապատվությունը նվաստացնող և առանձնապես դաժան վերաբերմունքով: Մի խումբ ակտիվիստներ ծեծի են ենթարկվել, ստացել են մարմնական վնասվածքներ ինչպես բերման ենթարկելու ընթացքում, այնպես էլ՝ հարցաքննությունների ժամանակ և ոստիկանական ավտոմեքենաներում: Հուլիսի 17-ին, 18-ին, 21-ին և 24-ին ոստիկանների կողմից բռնության են ենթարկվել նաև Խորենացի փողոցում իրենց մասնագիտական պարտականություններն իրականացնող մի շարք լրագրողներ:
Բերման ենթարկվածները, օրենքով սահմանված առավելագույն թույլատրելի ժամանակի խախտմամբ՝ ընդհուպ մինչև 30 ժամ, պահվել են անազատության մեջ՝ առանց սննդի և ջրի: Բացի ֆիզիկական բռնություններից՝ բերման ենթարկված քաղաքացիները ենթարկվել են նաև հոգեբանական ճնշումների. հուլիսի 18- ին բերման ենթարկված ցուցարարներից երկուսը հայտնել են, որ ոստիկանները դաժան ծեծի են ենթարկել իրենց, հարկադրել են համբուրել իրենց կոշիկները, հայհոյել ու թքել են իրենց վրա: Գրանցվել են նաև դեպքեր, երբ ոստիկանությունը ակտիվիստներին սպառնացել է նաև հեռախոսազանգերի միջոցով՝ հորդորելով չցուցաբերել քաղաքական ակտիվություն և չմասնակցել ցույցերին:
Տեղեկանքն ամբողջությամբ՝ այստեղ: