WhatsApp մեսենջերը նույնիսկ ջնջելուց հետո պահպանում է նամակագրությունը: Սա հայտնաբերել է անվտանգության հարցերի փորձագետ Ջոնաթան Զդզիարսկին: Այս մասին գրում է Gazeta-ն՝ վկայակոչելով The Verge-ը:
Մասնագետն ուսումնասիրել է հավելվածի վերջին տարբերակն ու հայտնաբերել, որ մեսենջերը iCloud ամպային պահուստարանում տվյալները պահպանում է նույնիսկ այն դեպքում, երբ օգտատերը նախընտրում է ջնջել նամակագրությունը:
Զդզիարսկիի խոսքով՝ նամակագրությունը ձեռք բերելու համար հարկավոր է դրան ֆիզիկապես հասանելիություն ունենալ, բայց դա, ամեն դեպքում, պոտենցիալ վտանգ է ներկայացնում:
Բացի այդ, քանի որ խոսքն iOS սարքերում տեղադրված WhatsApp-ի մասին է, հասանելիություն կարելի է նաեւ ունենալ՝ ձեռք բերելով ամպային պահեստի պահուստային պատճենը: Օրինակ՝ այդ քայլին կարող են գնալ հատուկ ծառայությունները: