Առողջապահության նախարարությունը քիչ առաջ ներկայացրել է, թե ինչ վիճակում են այսօր հիվանդանոց տեղափոխված «Սասնա ծռեր» խմբի անդամները:
«Երեւանի «Էրեբունի» ԲԿ տեղափոխված վիրավորվածներից մեկին, որը ստացել է ձախ ազդրի բեկորային վնասվածք, այս պահին վիրահատում են։ Մյուս վիրավորվածի երկու ազդրի մանր բեկորային վերքերը մշակվել են, վիճակը գնահատվում է միջին ծանրության»,- իր ֆեյսբուքյան էջում գրել է նախարարության մամուլի խոսնակ Անահիտ Հայթայանը։
Ավելի վաղ NEWS.am-ը հայտնել էր, թե Ոստիկանության պարեկապահակային գնդի տարածքից երկու վիրավորի են տեղափոխել «Էրեբունի» բժշկական կենտրոն: Իրավապահները թույլ չեն տվել տեսանկարահանել վիրավորներին: Ըստ ոստիկանության՝ ՊՊծ գնդի տարածքից կրակահերթեր արձակած եւ իրավապահների պատասխան կրակից վիրավորվածներն են Արթուր Մելքոնյանն ու Արմեն Լամբարյանը: