Ռուսաստանի քննչական կոմիտեի Մոսկվայի բաժանմունքի մի քանի քննիչներ հրաժարականի դիմում են ներկայացրել՝ կապված Շաքրո Մոլոդոյ անունով հայտնի քրեական հեղինակություն Զաքարիա Կալաշովի եւ գերատեսչության աշխատակիցների հանցավոր համաձայնության գործի հետ: Այս մասին գրում է «Ինտերֆաքս»-ը՝ վկայակոչելով իրավիճակին ծանոթ աղբյուրի:
Աղբյուրի համաձայն՝ աշխատանքից հեռանալու դիմում է գրել նաեւ քննիչ Անդրեյ Բիչկովը: Ավելի վաղ «Ինտերֆաքս»-ը գրել էր, որ Բիչկովին պաշտոնեական լիազորությունները չարաշահելու մեղադրանք է առաջադրվել Շաքրո Մոլոդոյի ենթակա Անդրեյ «Իտալացի» Կոչույկովի գործով:
Հետաքննությունը պարզել է, որ Բիչկովը չի միջնորդել Կոչույկովի կալանքի ժամկետը երկարաձգելու մասին, որը Elements ռեստորանի սեփականատերերից շորթման շուրջ հարուցված քրեական գործով է անցնում:
Աղբյուրի տվյալներով՝ քննիչը խոստովանել է, որ գործել է իր ղեկավարի՝ ՔԿ մայրաքաղաքային վարչության պետի առաջին տեղակալ Դենիս Նիկանդրովի անմիջական հրահանգով: Ծրագրվում է նման մեղադրանք առաջադրել ՔԿ ստորաբաժանման եւս երեք քննիչի: