Ոստիկանությունը պարզաբանել է Սարի թաղում տեղի ունեցած միջադեպը:
«Որոշ անձինք ապատեղեկատվություն են տարածում, թե ՊՊԾ գնդի տարածքում գործողություն է կատարվում:
ՊՊԾ գնդի տարածքում այս պահին որեւէ գործողություն չի կատարվում: Իրականում մի խումբ անձինք փորձել են խախտել ոստիկանության կողմից պահպանվող անվտանգության գոտին եւ թափանցել գնդի տարածք:
Ոստիկանությունը կիրառում է հատուկ միջոցներ:
Քաղաքացիներին կոչ ենք անում զերծ մնալ հակաօրինական եւ սադրիչ գործողություններից»,- իր ֆեյսբուքյան էջում գրել է լրատվության վարչության պետ Աշոտ Ահարոնյանը:
Թե քանի մարդ է բերման ենթարկվել ոստիկանության բաժանմունքներ, լրատվական ծառայությունից չհայտնեցին՝ հորդորելով սպասել պաշտոնական տեղեկատվությանը:
Նշենք, որ Սարի թաղում ցուցարարներին ցրելու համար ոստիկանները ծխանռնակներ են նետել ցուցարարների վրա։ Տարածքում նաեւ հրդեհ է բռնկվել, նախնական տեղեկություններով՝ կան տուժածներ։
Մեր թղթակցի փոխանցմամբ, քաղաքացիական հագուստով անձինք խոչընդոտել են լրագրողների աշխատանքը, արգելել նրանց տեսագրություններ կատարել։ «Ազատություն» ռադիոկայանը հայտնել է, որ իր նկարահանող խմբի անդամներ Կառլեն Ասլանյանն ու Հովհաննես Մովսիսյանը ծեծի են ենթարկվել քաղաքացիական հագուստով անձանց կողմից։ Այրվածքներ է ստացել նաեւ Ա1+-ի թղթակիցը: Սարի թաղում ՍիվիլՆեթի լրագրողի եւ օպերատորի ոտքերի տակ պայթուցիկ է պայթել, ինչի հետեւանքով նրանք վնասվածքներ են ստացել։
Նշենք, որ իրավիճակի խիստ թեժ է նաեւ Խորենացի փողոցում, որտեղ մեծ բազմություն է հավաքվել։ Ոստիկանության փոխգնդապետ Այվազյանը դիմելով ցուցարարներին՝ հայտարարել է, թե հավաքն անօրինական է եւ կոչ է արել դադարեցնել այն։ Որոշ ժամանակ անց ոստիկանները սկսել են ցրել հավաքը։