Սարի թաղում եւ Խորենացի փողոցում ոստիկանների եւ քաղաքացիների միջեւ նախօրեին տեղի ունեցած բախումների հետեւանքով «Գրիգոր Լուսավորիչ» ԲԿ է տեղափոխվել 50 մարդ, որոնցից 36-ն արդեն դուրս են գրվել: Այս մասին այսօր՝ հուլիսի 30-ին, լրագրողների հետ զրույցում նշեց «Գրիգոր Լուսավորիչ» բժշկական կենտրոնի փոխտնօրեն Գագիկ Մանուկյանը:
Նրա խոսքով, հիվանդներից մեկը, որն այրվածքներ է ստացել եւ վիճակը գնահատվում է ծանր, տեղափոխվել է Ճառագայթային բժշկության եւ այրվածքաբանության գիտական կենտրոն:
«Գրիգոր լուսավորիչ» ԲԿ փոխտնօրենը նշել է, որ իրենց մոտ մնացած 13 հիվանդներից 7-ը գտնվում են վերակենդանացման բաժանմունքում. Նրանցից միայն մեկին են վիրահատել, որի աչքն են հեռացրել: Մնացածի վիճակը կայուն է, ոչ մեկի կյանքին վտանգ չի սպառնում:
Նշենք, որ հուլիսի 29-ի երեկոյան Խորենացի փողոցում եւ Սարի թաղում բախումներ են տեղի ունեցել քաղաքացիների եւ ոստիկանների միջեւ:
ՊՊԾ գնդի առջեւ գտնվող տարածքը (Սարի թաղ) ազատելու մասին նախազգուշացումից հետո ոստիկանությունը հատուկ միջոցներ է կիրառել, հարձակվել մարդկանց վրա։ Պաշտոնական տվյալներով, վեց տասնյակ մարդիկ մարմնական վնասվածքներ են ստացել։ Ակցիայի ընթացքում նաեւ բազմաթիվ լրագրողներ են տուժել:
Միեւնույն ժամանակ, քաղաքացիներ են բերման ենթարկվել Խորենացի փողոցից: Ընդհանուր առմամբ, ըստ ոստիկանության, բերման է ենթարկվել 165 քաղաքացի:
Առողջապահության նախարարության փոխանցմամբ, հիվանդանոցներ են տեղափոխվել 60 մարդ: