ՄԱԿ՝ մարդու իրավունքների պաշտպանության վարչությունը ցնցված է տեսանյութից, որը ցուցադրում է Ավստրալիայի Հյուսիսային տարածքում՝ Դոն Դեյլ կալանավայրում, անչափահաս բանտարկյալների նկատմամբ անմարդկային վերաբերմունքը։ Լրագրողների ֆիքսած կադրերում երեւում են տեղաբնիկ ժողովուրդների անչափահաս երեխաները, որոնցից ոմանք 10 տարեկանից մեծ չեն։
«Երեխաներից ոմանց երկար ժամանակ պահում են մեկուսացման մեջ, երբեմն մինչեւ 6 շաբաթ մութ եւ տոթ խցիկներում՝ առանց մաքուր օդի եւ առանց ջրի։ Մենք տեղյակ ենք, որ եղել է դեպք, երբ աշխատակիցները արցունքաբեր գազ են արձակել բանտախցում, որտեղ եղել են 6 երեխա»,– ասել է վարչության ներկայացուցիչ Ռուփերթ Քոլվիլը։
Նա նշել է, որ խոսքը երեխայի իրավունքների մասին կոնվենցիայի, ինչպես նաեւ խոշտանգումների եւ դաժան ու անմարդկային պատժատեսակների դեմ կոնվենցիայի խախտման մասին է, որոնք վավերացրել է Ավստրալիան։
Լրագրողները նկարել են, թե ինչպես են աշխատակիցները դեռահասների նկատմամբ արցունքաբեր գազ կիրառում, նրանցից մեկին մերկացնում են, մյուսի վզից բռնում են եւ նետում բանտախուցը։ Եվս մի տղայի կապել էին աթոռին, իսկ գլխին պարկ հագցրել ու այդպես պահել 2 ժամ։ Բոլոր տուժած դեռահասները Ավստրալիայի բնիկ ժողովուրդների ներկայացուցիչներ են։
Ավստրալիայի վարչապետ Մալքոլմ Թյորնբուլն արդեն կարգադրել է հետաքննել միջադեպերը։ Նա նաեւ ասել է, որ ցնցված է այդ կադրերից, եւ ենթադրել է, թե հաստատությունը փորձել է ծածկել սկանդալը։
Սակայն AFP-ի տեղեկություններով՝ իրավապահները ծաղրել են վարչապետին՝ հայտարարելով, թե պաշտոնյաներն արդեն մի քանի տարի անտեսում են պատժիչ հաստատություններում են բռնության մասին վկայությունները։