«Լայֆնյուզ» հեռուստաընկերության օպերատորը՝ Տիգրան Գասպարյանը, որը նախօրեին Սարի թաղում վիրավորվել էր ցուցարարների նկատմամբ ոստիկանության կիրառած հատուկ միջոցներից, ոտքի բեկորային վնասվածքներ ունի, քայլել չի կարողանում:
Երեւանի «Սուրբ Գրիգոր Լուսավորիչ» բժշկական կենտրոնում գտնվող օպերատորն այսօր՝ հուլիսի 30-ին, լրագրողների հետ զրույցում պատմեց, թե ինչպես է վիրավորվել:
«Այդ ժամանակ բանակցություններ էին գնում, Զարուհին ու Արմենը մոտեցան, որ խոսեն ոստիկանների հետ: Ես լրագրող ընկերների հետ կանգնած է, ոստիկաններից մեկը մեզ ասաց՝ գնանք աջ, էնտեղ ավելի անվտանգ ա: Հենց ուզեցինք գնալ, հատուկ միջոցներ կիրառեցին, նռնակներից (խմբ. խոսքը լուսաձայնային նռնակների մասին է) մեկը հենց ինձ վրա պայթեց: Հետո ես զգացի երրորդ, չորրորդ պայթյունները»,- պատմեց Տիգրան Գասպարյանը:
Տիգրանը պատմեց, որ ընկերներն իրեն տարել են տարածքում գտնվող մի հացի փուռ, որտեղ ոտքից հանել են բեկորները, մինչեւ հիվանդանոց տեղափոխվելը:
Տիգրան Գասպարյանի հետ վերակենդանացման բաժանմունքից հիվանդասենյակ է տեղափոխվել նաեւ Ա1+-ի թղթակից Ռոբերտ Անանյանը:
Ռոբերտ Անանյանը, որը պայթյունների հետեւենաքով վնասվածքներ է ստացել ոտքի շրջանում, նույնպես քայլել չի կարողանում: Լրագրողների հետ զրույցում նա կարծիք հայտնեց, որ լրագրողները թիրախավորված են եղել ոստիկանության կողմից:
«Իրենք ուղղորդեցին ինչ-որ տարածք, լրագրողները հենց գնացին իրենց ասած տարածք, առաջին պայթյունները հենց լրագրողների շրջանում եղան: Իմ դիտարկմամբ լրագրողները թիրախավորված էին: Առավել ագրեսիվ էին այն լրատվամիջոցների նկատմամբ, որոնք տեսագրում էին, հենց տեսախցիկների լույս էին տեսնում, այդ ուղղությամբ պայթուցիկ էին նետում»,- պատմեց Ռոբերտ Անանյանը:
Նշենք, որ Սարի թաղում եւ Խորենացի փողոցում ոստիկանների եւ քաղաքացիների միջեւ նախօրեին տեղի ունեցած բախումների հետեւանքով «Գրիգոր Լուսավորիչ» ԲԿ է տեղափոխվել 50 մարդ, որոնցից 36-ն արդեն դուրս են գրվել:
Հուլիսի 29-ի երեկոյան Խորենացի փողոցում եւ Սարի թաղում բախումներ են տեղի ունեցել քաղաքացիների եւ ոստիկանների միջեւ:
ՊՊԾ գնդի առջեւ գտնվող տարածքը (Սարի թաղ) ազատելու մասին նախազգուշացումից հետո ոստիկանությունը հատուկ միջոցներ է կիրառել, հարձակվել մարդկանց վրա։ Պաշտոնական տվյալներով, վեց տասնյակ մարդիկ մարմնական վնասվածքներ են ստացել։ Ակցիայի ընթացքում նաեւ բազմաթիվ լրագրողներ են տուժել:
Միեւնույն ժամանակ, քաղաքացիներ են բերման ենթարկվել Խորենացի փողոցից: Ընդհանուր առմամբ, ըստ ոստիկանության, բերման է ենթարկվել 165 քաղաքացի:
Առողջապահության նախարարության փոխանցմամբ, հիվանդանոցներ է տեղափոխվել 73 մարդ: