«Ժառանգություն» կուսակցության փոխնախագահ Արմեն Մարտիրոսյանին մեղադրանք է առաջադրվել ՀՀ քրեական օրենսգրքի 225 հոդվածի առաջին մասով սահմանված՝ զանգվածային անկարգություններ կազմակերպելու կասկածանքով: Այս մասին NEWS.am-ի թղթակցի հետ զրույցում նշեց նրա փաստաբան Գիվի Հովհաննիսյանը:
Նրա խոսքով, Արմեն Մարտիրոսյանը չի ընդունում առաջադրված մեղադրանքը: «Նա միշտ խաղաղության աղավնի է եղել եւ երեկ էլ փորձել է հանդարտեցնել կողմերին: Սադրիչներին գտել է, փորձել է այնպես անել, որ բախումներ չլինեն: Դրա վերաբերյալ կան տեսագրությունները»,-ասաց փաստաբանը:
Ավելի վաղ NEWS.am-ը հայտնել էր, որ հուլիսի 29-ի երեկոյան Խորենացի փողոցում եւ Սարի թաղում ոստիկանությունն ուժային գործողությունների է դիմել: ՊՊԾ գնդի առջեւ գտնվող տարածքը (Սարի թաղ) ազատելու մասին նախազգուշացումից հետո ոստիկանությունը հատուկ միջոցներ է կիրառել, հարձակվել մարդկանց վրա։ Պաշտոնական տվյալներով, 60-ից ավելի մարդ մարմնական վնասվածքներ է ստացել եւ տեղափոխվել հիվանդանոցներ: Ակցիայի ընթացքում նաեւ բազմաթիվ լրագրողներ են տուժել:
Ոստիկանության փոխանցմամբ բերման է ենթարկվել 165 մարդ, որից 26-ը ձերբակալվել են: Ձերբակալվածների թվում է նաեւ Անդրիաս Ղուկասյանը: