Երեւանի քաղաքապետարանը հանդես է եկել հայտարարությամբ, որտեղ նշվում է, որ Էրեբունի վարչական շրջանում եւ հարակից փողոցներում իրավապահ մարմինների կողմից իրականացվում են քաղաքացիների անվտանգության ապահովմանը եւ հասարակական կարգի պահպանությանն ուղղված համալիր միջոցառումներ:
Հաղորդագրության մեջ,մասնավորապես, ասվում է.«Սույն թվականի հուլիսի 17-ից մինչ օրս զինված խմբի կողմից ՀՀ ոստիկանության պարեկապահակային ծառայության (ՊՊԾ) գնդի տարածքը զավթելու կապակցությամբ Էրեբունի վարչական շրջանում եւ հարակից փողոցներում իրավապահ մարմինների կողմից իրականացվում են քաղաքացիների անվտանգության ապահովմանը եւ հասարակական կարգի պահպանությանն ուղղված համալիր միջոցառումներ:
Հաշվի առնելով այն հանգամանքը, որ «Հավաքների ազատության մասին» ՀՀ օրենքին համապատասխան՝ վերը նշված վայրերում հավաք անցկացնելու իրազեկում չի ներկայացվել եւ հավաքն անցկացնելու վերաբերյալ ի գիտություն ընդունելու մասին որոշում չի կայացվել, ինչպես նաեւ նկատի ունենալով, որ առկա է մարդկանց կյանքին եւ առողջությանն անմիջականորեն սպառնացող իրական վտանգ, Երեւանի քաղաքապետարանը տեղեկացնում է, որ քաղաքի նշված հատվածներում հանրային որեւէ միջոցառման իրականացումն արգելված է»:
